د مشرانو جرګې یو شمېر غړیو نن د برېښنايي پېژندپاڼو په اړه د اجرایوي ریاست نوې وړاندې شوې طرحه د اساسي قانون د څلورمې مادې پر خلاف وګڼله او د دې طرحې له منلو سره یې اختلاف څرګند کړ.
د افغانستان د اساسي قانون د څلورمې مادې په دویمه فقره کې راغلي: د افغانستان ملت عبارت دی له هغو ټولو افرادو څخه چې د افغانستان تابعیت ولري. د همدې مادې په څلورمه فقره کې راځي: د افغان کلمه د افغانستان د ملت پر هر فرد اطلاقېږي.
په مشرانو جرګه کې د زابل ولایت وکیل زلمي زابلي وویل، په داسې حساسو شرایطو کې چې ډېرې ملي ګټې تر پښو لاندې کېږي؛ حکومت د برېښنايي پېژندپاڼو په اړه بحث کوي، چې څنګه به وې او څنګه دې شي، په داسې حال کې چې دا موضوعګانې تعصبات راپاروي.
بل سناتور شېرمحمد اخندزاده وویل، د دوی غوښتنه په برېښنايي پېژندپاڼه کې د افغان کلمې لیکل دي او حکومت ته په کار دي، چې د دې طرحې د عملي کولو مانع شي، ځکه چې له پکتیا نه تر نیمرزه هېڅ وګړی دا تذکرې نه اخلي.
دغه سناتوران ټینګار کوي، که حکومت یې غوښتنو ته پام ونه کړي او د اجرایوي ریاست د دې طرحې مانع نه شي؛ دوی به پراخ لاریونونه او اعتراضونه پيل کړي.
خو د اجرایوي ریاست ویاند وايي، چې ولسمشر او د افغان دولت مالي ملاتړي د دې برېښنايي پېژندپاڼو د وېشلو هرکلی کړی دی او دا طرحه د اساسي قانون پر خلاف نه ده.
د برېښنايي پېژندپاڼو وېشل د ملي یووالي حکومت له لومړیو ورځو نه هغه جنجالي موضوع ده، چې تر اوسه پورې یو مناسب حل ته نه ده وتلې.
د اجرایوي رییس د ویاند مرستیال جاوېد فیصل تېره پنجشبنې ویلي وو، چې د دې طرحې له مخې به د برېښنايي پېژندپاڼو تر څنګ هېوادوالو ته یو بل کارت هم ورکړل شي، چې د یو شخص ټولې ځانګړنې په کې لیکل شوې وي.
د فیصل پر وینا، دغه طرحه د مرستندویو بنسټونو د منلو وړ ګرځېدلې او د ټولو اختلافي برخو له پاره د حل لار لري.
