د اطلاعاتو او وکلتور وزیر عبدالباري جهاني هرات ولایت ته تللی و او هلته یې په خبري غونډه کې ویلي دي، چې دغه وزارت د نورو وزارتونو په پرتله کمه بودیجه لري.
جهاني زیاتوي، چې دغه وزارت ته په واک کې ورکړل شوې بودیجې کمه ده او په دې سره نه شي کولی د لرغونو اثارو د له منځه تلو مخنیوی وکړي.
د اطلاعاتو او کلتور وزیر وايي، چې د دغه وزارت کلنۍ بودیجه له ۱۶ تر ۱۸ میلیونو افغانیو کیږي او زیاته یې کړه، چې دغه بودیجه د زده کړیزو سیمینارو له پاره هم بسنه نه کوي.
جهاني هرات ولایت کې د لرغونو اثارو د له منځه تللو په اړه وویل، چې دی به د هرات ولایت تاریخي لرغونو ودانیو او اثارو د ناسم حالت په اړه وزیرانو شورا کې خپل راپور وړاندې کړي.
د سیمه ییزو چارواکو په خبره، په هرات ولایت کې له ۸سوو زیات لرغوني اثار او ودانۍ موجودې دي، چې ځېنې یې د نابودۍ له ګواښ سره مخ دي.
د هرات زیات شمېر لرغوني اثار د تیموریانو د وخت دي او شاوخوا ۴سووه کلونه کیږي، چې پر ځای پاتې دي.
