په لوګر کې ۳ زره جریبه ځمکه غصب شوې

د لوګر ولایتي شورا یو شمېر غړیو په مرکز پل علم کې خبري غونډې ته وویل، چې په تېرو شپږو میاشتو کې په دغه ولایت کې د ځمکو غصب دوه برابره زیات شوی دی.

د لوګر ولایتي شورا رییس محمد ناصر غیرت وویل، د محمداغې ولسوالۍ به مغل خېلو سیمه کې ۳ زره او ۱۲۱ جریبه دولتي ځمکه او په مرکز پل علم کې ۱۱ سوه نومرې دولتي ځمکه غصب شوې ده.

غیرت زیاته کړه، تراوسه ولایتي اداره د دولتي ځمکو د غصب په مخینوي او د غاصبینو په نیولو کې پاتې راغلې ده.

بل خوا د لوګر د امنیې قوماندانۍ د جینايي جرمنو پروړاندې د مبارزې مدیر محمدجان عابد وايي، چې په تېره یوه میاشت کې ۳۶ لوی او واړه غاصبین د دولتي ځمکو د غصب په تور نیولي دي.

د ولایتي ادارې رسنیز دفتر وايي، په تېر یو کال کې شاوخوا ۴ زره جریبه دولتي ځمکه له غاصبینو راګرځولې او د یوزرو او ۵۰۰ جریبه دولتي ځمکې اسناد یې څارنوالي ته سپارلي دي.

د لوګر د ځمکو د ثبت د ادارې د راپور له مخې، په دغه ولایت کې ۱۹۰۰ غاصبینو یو لک جریبه ځمکه غصب کړې ده.