د بغلان ولایت د ډنډ غوري ولسوالۍ خلکو ته وسله والو طالبانو خبرداری ورکړی، چې د ودونو په مراسمو کې د دوی پر وینا د "موسیقي او لهولعب" پر ځای که د طالبانو ترانې او د دوی د مبلغینو تبلیغ خپور نه شي، نو د واده کورنۍ ته به سخته سزا ورکړي.
د طالبانو اخلاقي کمېسیون د موسیقۍ ثبتول، غږول او خپرول جرم ګڼي او وايي، چې له دې وروسته که د ډنډ غوري ولسي خلکو د ودونو په مراسمو کې د موسیقۍ غږ واورېدل شي، جدي چلند به ور سره وکړي.
د ډنډ غوري اوسېدونکی خال مراد سلام وطندار سره د مرکې پر مهال وویل، چې د طالبانو له نوي قانون څخه یو شمېر خلک خوشاله دي او ملاتړ یې کوي.
د مراد په خبره، د ډنډ غوري زیات شمېر اوسېدنکي د طالبانو د پرلپسې قوانیونو له صادرولو ستړي شوي دي؛ د طالبانو دغه نوی قانون په کلکه غندي او وايي، چې د طالبانو دغه عمل افراط دی او په جهل پورې تړل عمل یې بولي.
طالب اورپکو د فاتحې په مراسمو کې هم دې ته ورته قوانین ټاکلي دي.
ویل کیږي، چې په دغې ولسوالۍ کې د ودونو له مراسمو او جوماتونو څخه یواځې د طالبانو د تبلیغانو غږونه اورېدل کیږي.
په دغو مراسمو کې طالبان له خلکو د افغانستان دولت په خلاف د جهاد غوښتنه کوي.
ویل کیږي، په ډنډ غوري کې د واده او فاتحې په مراسمو کې طالبانو د نابلل شویو میلمنو په ډول راځي او له دغو مراسمو نه په استفادې خپلې موخې په خلکو کې تبلیغ کوي.
