د افغانستان د ملي امنیت شورا ویلي، ټاکل شوې د طالبانو سل نور زندانیان هم نن پنجشبنه (د حمل میاشتې په یویشتمه) د بګرام له زندانه خوشې شي. د دغې ډل سل بندیان تېر ماښام د هغوی سن، روغتیایي وضعیت او د بند مودې ته په پام سره خوشې شوي دي.
د ملي امنیت شورا وياند جاويد فيصل پر خپله ټویټر پاڼه ویلي، د ولسمشر محمد اشرف غني د لومړۍ ګڼې فرمان سره سم نن هم ۱۰۰ نور طالب بنديان د بګرام له زندانه د هغوی سن، روغتیایي وضعیت او د بند مودې ته په پام سره خوشې کېږي.
ولسمشر غني د خپلې لوړې مراسمو کې د پنځه زره طالب زندانیانو د خوشې کولو فرمان صادر کړ او ويې ویل، دغه زندانیان به د سولې هڅو یوې برخې په توګه په تدریجي ډول د افغانستان له زندانونو خوشې شي.
خوشې شوي زندانیان، د پروان، پکتیا، پکتیکا، بغلان، هلمند، کندهار او ځينو نورو لایتونو دي.
د بګرام زندان مسوولان وايي، د طالبانو زندانیان د ملي امنیت شورا د یوه پلاوي په حضور کې خوشې شوي دي.
د ملي امنیت شورا د هغو طالب زندانیانو په اړه چې تېر ماښام خوشې شوي ویلي، د زندانيانو خلاصون د هغه لست پر بنسټ کېږي چي د طالبانو يوه تخنيکي ټيم افغان حکومت سره شريک کړي وو.
افغان حکومت وايي، دا زندانیان د ملي امنیت عمومي ریاست او لویې څارنوالۍ له لوري بایومټریک شوي او هېڅکله به بېرته د جګړې ډګر ته نه ورګرځي.
ورته وخت کې طالبانو بیا د بندیانو د خوشي کولو پر بهیر نیوکه کړې او په خبره یې بندیان له پروسې او هوکړې سره سم نه دي خوشې شوي، نو دوی ته د منلو نه دي.
طالبان وایي، د دوی پلاوی هم له کابل وتلی او د زندانیانو د خوشې کولو پر سر خبرې درېدلي دي.
دغه سل طالب زندانیان داسې مهال له بند خوشې کیږي، چې د پروان امنیتي مسوولینو نن سهار وویل، طالب جنګیالیو د بګرام پر هوايي ډګر توغندیز بریدونه کړي دي.
