جمهور رییسلیک سرایی نینگ حقیقت کمیسیونی، فاریاب ولایتیده بوندن 10 کون آلدین جمعیت و جنبش حزبی اورتهسیده یوز بیرگن اوریشی سیاسی ایمس جنایی بیر حادثه دیگن.
مملکت ترانسپورت وزیری محمدالله بتاش، اقتصاد وزیری عبدالستار مراد، ملی مدافعه و ایچکی ایشلر وزیرلیگی نینگ ایکّی بلند مرتبهلی جنرالیدن عبارت هیات ترکیبی فاریاب حادثهسینی یقیندن اورگهنیش مقصدیده مذکور ولایتگه بارگن ایدی. هیاتلر ولایتده اورگنگن مسالهنی بوگون خبری بیر اولتیریش آرقهلی معلوم قیلدی.
هیات باشلیغی، ولایت کینگشی نینگ اعضالری، آقسقاللر کینگشی، مدنی فعاللر، انسان حق و حقوقلری بوییچه کمیسیون اعضالری و لایت نینگ قطار قوم بویوکلری بیلن آلیب بارگن تیکشیرودن سونگ اوتگن ییل حوت آیی نینگ 28- سیده میمنه شهرینینگ دمقول منطقه سیده یوزبیرگن واقعه طفیلی 4 کیشی قربان بولیب و 10 انسان یرهلنگنلیگی سیاسی ایمس جنایی و عایلهوی قیین چیلیکدن کیلیب چیققن دیدی.
هیاتگه رهبرلیک قیلگن افغانستان ترانسپورت و هوا یوللر وزیری محمدالله بتاش، واقعه نینگ عامللری قانونگه موافق جزالهنیشی ضرور دیگن.
جناب بتاش، میمنه شهریده نا قانونی قوراللی شخصلر یوریشی آلدی آلینیشی، بو کیشیلرنینگ قیتهدن قیشلاغیگه باریشی، قیصار و المار تومنی نینگ قتناو یولی دوباره آچیلیشی، حادثه عامللریدن بیر بلخ ولایتیده قولگه آلینیب کابلگه یوباریلیشی و واقعهگه دخلدار شخصلردن بعضیلری قوراللی طالبلرگه قوشیلگن لیگی تیکشیریلیشی هیات نینگ بو باره ده آلگن سونگی قرارلریدن حسابلنهدی دیگن.
اقتصاد وزیری همده هیاتگه اعضالیک قیلگن عبدالستار مراد، مرکزی حکومتدن فاریاب ولایتیده امنیتی یخشی صورتده تامین بولیشی اوچون ولایتده 500 نفرلیک بیر قطعه تشکیل ایتیلیشینی سورهگن.
عین حالده، جناب مراد، ناقانونی قوراللنگن شخصلر یانیدهگی برچه حربی جهازلر ییغیب آلینیشی اوستیده علیحده تاکید قیلگن.
بوندن بیر یریم هفته آلدین فاریاب ولایتی مرکزی میمنه شهرینینگ بیرینچی ناحیهسیده جنبش و جمعیت حزبی طرفدارلری اورتهسیده یوزبیرگن آتیشمه عاقبتیده قیصار تومنی نینگ امنیه قوماندانی نظامالدین قیصارینینگ اوغلی اولدیریلگن ایدی.
شونینگدیک آتیشمه 2 کیشی جنبش و 2 نفر جمعیت حزبی طرفدارلری عالمدن اوتگن ایدی. عین حالده، 10 کیشی داخل 8 پولیس بو واقعهده تَن جراحتی آلگندی.
آتیشمه نینگ جریانی حاضر هم ولایت نینگ پشتونکوت و المار تومنیدهلریده دوامی بارلیگی ایتیلهدی.
