بغلان امنیه قومندانی جنرال عبدالجبار پردلینینگ بوگون «سهشنبه» بیر خبری ییغینده میدیاگه ایتیشیچه، بغلان مرکزی دندغوری منطقهسیده امنیتی کوچلر تامانیدن «خورشید تورت» آتی آستیده یولگه قوییلگن تورت کونلیک عملیات جریانیده، طالبلرنینگ 7 ییریک قومندانی شامل، 31 اعضاسی هلاک بولیب و باشقه 47 تهسی یرهلنگن. جناب پردلینینگ کوپهیتیریشیچه، امنیتی کوچلر دندغوری منطقهسینی تازهلب آلغه بارماقده و حاضرگچه اونلرچه قیشلاق طالبلردن تازهلنگن.
بغلان امنیه قومندانینینگ، امنیتی کوچلر قربانلیگی توغریسیده ایتیشیچه، «خورشید تورت» عملیات جریانیده، بیر پولیس هلاک بولیب و باشقه اوچ حربی عسکر یرهلنگن.
بیراق، طالبلر سوزلاوچیسی، میدیاگه بیر پیام یوباریب، مذکور عملیات جریانیده امنیتی کوچلردن 45 تهسی اولیب و یرهلنگنلریدن خبر بیرگن.
سونگی توقنهشوولر جریانیده، عیاللر و بالهلر شامل اون تینچ اهالی اولیب و یرهلنگن. «خورشید تورت» عملیاتی باشلنگن چاغیده، یوزلرچه عایله اولیمدن قورقیب، مال و جایلرینی ترک ایتیب، بغلان ولایتی باشقه منطقهلریگه بدرغه بولگنلر.
شونینگدیک، بوگون حربی کوچلر تامانیدن غزنی ولایتیده یولگه قوییلگن عملیات نتیجهسیده، 7 قوراللی طالب هلاک بولیب و باشقه 14 تهسی یرهلنگن. غزنیده حربی کوچلر اوچینچی لوا سوزلاوچیسی جناب نورنینگ سلاموطندارگه ایتیشیچه، بو عملیات حربی کوچلر تامانیدن پولیس کوچلری همکارلیگیده اندر، ده یک و آب بند تومنلریده یولگه قوییلگن.
طالبلر حاضرگچه بو عملیات توغریسیده میدیاگه هیچ نرسه دیمهگن.
