وسله والو طالبانو تېره ورځ (چهار شنبه) ماسپښین ناوخته د کابل ښار پولیسو ۶ امنیتي حوزې پر ودانۍ او د ۱۲ ناحیې په یو امنیتي مرکز ډله ییز ځانمرګي بریدونه وکړل.
د عامې روغتیا وزارت مطبوعاتي برخې مسوول محمد اسماعیل کاووسي وايي، چې د کابل ښار په دواړو بریدونو کې ۱۶ تنه هېوادوال وژل شوي او ۴۴ تنه نور ټپيان دي.
دی وايي، د پېښې ټپیان د استقلال روغتون ته وروړل شوي، چې د ۱۰ ټنو ټپيانو حالت د اندېښنې وړ ښودل شوی دی.
د لومړنیو معلوماتو له مخې یو ځانمرګي بریدګر لومړی له چاودېدونکو توک بار موټر د ۶ امنیتي حوزې شا دېوال سره وهلی دی او نورو بریدګرو ته یې زمینه برابره کړې ده.
دغه راز له دې بریده څو شېبې وروسته د کابل ښار ۱۲ ناحیې سیمه کې هم پر یو امنیتي مرکز طالبانو برید وکړ.
وسله والو طالبانو دوی ته په منسوب شوي وېب پاڼې او ټوېټر کې د بریدونو مسوولیت منلی دی.
