سونگی ییللرده اوزاق ییردن «آنلاین» عالی اوقوو افغانستانده اوقووچیلر اینیقسه یاشلر تامانیدن خوش قرشیلنگن و یاشلر باشقه ایشلری یانیده چیت ایل مملکتلردهگی بیلیم یورتلرده ایستهگن بولیملریگه اوقیب بیلهدی.
بیراق، افغانستانده فساد و قولاب کارلیک اوج آلگنی باعث، بوندهی اوقوو حجت اعتبارینی سوراققه روپهره قیلگن.
افغانستان عالی اوقوو وزیرلیگی رسمیلرینینگ ایتیشیچه، حجتلر قولابی توزهتیلیشی و اوزاق ییردن عالی اوقوو اوچون قانونی لایحه یوقلیگی سبب، آنلاین عالی اوقوو حجتی اعتبارلی ایمس دیر.
سلاموطندار بیلن صحبت اوتکزگن عالی اوقووچی وزیرلیگی سوزلاوچیسی فیصل امیننینگ ایتیشیچه، اولر اساسی بیر لایحه قوریب مملکتده اوزاق ییردن عالی اوقوو فعالیتلرینی باشلشگه سعی و حرکت قیلهدیلر و بوندهی عالی اوقوو حجتیگه اعتبار بخشلهیدیلر.
عالی اوقوو وزیرلیگی سوزلاوچیسینینگ کوپهیتیریشیچه، اولر اوزاق ییردن عالی اوقوو خصوصیده تجربهگه ایگه مملکتلرنینگ تجربهلریدن فایدهلنیب و بوتوغریده عملی آدیملر کوتریشگه حرکت قیلهدیلر.
بیراق، حاضر قطار یاشلر اوزاق ییردن «آنلاین» عالی اوقوو حجتیدن فایدهلنیب دولتی و خصوصی ادارهلرده ایش قیلیب کیلماقدهلر.
اوزاق ییردن «آنلاین» عالی اوقوو حجت قولگه کیریتگنلردن بیری طاهر رسولی، خصوصی شرکتلردن بیریده ایشلهیدی.
اونینگ ایتیشیچه، « بیلیم یورت ایچیدهگیلر بیلن بیزنینگ حجتمیزگه هیچ بیر فرق یوق، اوشه بیلیم یورت و عالی اوقوو وزیرلیگینینگ تاپهسی دیر و ایکاوی هم بیر اعتبارگه ایگه بولگن.»
جناب رسولینینگ کوپهیتیریشیچه، اقتصادی قیینچیلیک سبب ایچکی بیلیم یورتلر و مملکتدن تشقری باریب درس اوقیه آلمهگن و برچه سوراقلرینی انترنت آرقهلی اوقیتووچیلری بیلن شریک قیلیب و قولیلیکده جوابلرینی قولگه کیریتر ایکن.
بیلیم یورت اوقیتووچیلریدن بیری محمدامین رشادتنینگ ایتیشیچه، اوزاق ییردن «آنلاین» عالی اوقوو ینگی و منفعتلی بیر لایحه بولگن، افغانستانده اوستیگه ایشلنمهگن و عالی اوقوو وزیرلیک رسمیلری بوتوغریده دقت قیلیشلری لازم.
بیراق، اونینگ ایتیشیچه، افغانستانده برچه آنلاین اوقوو ادارهلری، عالی اوقوو وزیرلیگینینگ نظارتیده فعالیت قیلیشلری کیرهک.
