بوگون (شنبه 8 جوزا) تورکیه دولتینینگ افغانستانده ملکی و تخنیکی ایشلر بوییچه دفتری (تیکا) نینگ مالی یاردمی بیلن مملکت ملی آرشیف محققلری اوچون مطالعه و تحقیق سالونی زمانوی امکانیتلر بیلن ایجاد ایتیلیب ایش آلیشگه باشلهندی.
مذکور سالون آچیلیش مراسمیده افغانستان مدنیت و اخبارت وزیری عبدالباری جهانی و تورکیه دولتینینگ ملکی و تخنیکی ایشلر دفتری ATIK باشلیغی سلیمان شاهین اشتراک ایتیب، ایکی مملکت رسمیلری اورتهسیده سالوننینگ توزهتیش شرطنامهسی تسلیم بیریلدی.
افغانستان ملی آرشیف باشلیغی خانم معصومه نظرینینگ معلوم قیلیشیچه، بوندن آلدین ملی آرشیف محققلری مطالعه و تحقیق اوچون باشقه ییرلرده باریب مناسب فضا بولمهگنلیگی دلیل یخشی تحقیق و مطالعه قیله آلمس ایکنلر.
اونگه کوره، مذکور مطالعه و تحقیق سالونی آچیلیشی بیلن نه فقط ملی آرشیف محققلری بو ییرده مناسب فضاده مطالعه قیلیشهدیلر بلکیم سالون، کنفرانس، ورکشاپ، سمینار و باشقه احتفال و ییغینلر اوتکزیش ظرفیتی بیلن توزهتیلگن.
خانم نظری افغانستانده فعالیت قیلهدیگن ATIK دفترینینگ اوشبو سالوننی ملی آرشیف محققلری اوچون ایجاد قیلیشی بیلن محققلرده مطالعه و تحقیق تینچ فضاسی، مصؤونلیک و آرم فکرده اویلیش زمینهسی یرهتیلگن دیب بیلهدی.
شو بیلن بیرگه افغانستان مدنیت و اخبارات وزیری عبدالباری جهانی، تیکا دفترینینگ ملی آرشیف محققلری اوچون توزهتیب بیرگن سالونیدن خرسندلیک بیلدیریب، تورکیه دولتی و تیکا موسسهسیدن اوز ممنونیتینی بیلدیردی.
جناب جهانی، افغانستان ملی آرشیفی منطقه بویلب تینگسیز و مهم آرشیفلردن بیری بولگنلیگینی تیلگه آلدی.
اونینگ معلوم قیلیشیچه، ملی آرشیفده موجود کمچیلیک مطالعه و تحقیق سالونی بولگن ایکن، تورکیه دولتی مالی یاردمی و تیکا دفتری نینگ تشبثی بیلن ایجاد ایتیلگن مذکور سالون، ملی آرشیف کمچیلیگینی برطرف قیلگن.
ایتیلیشیچه، بوندن بویان ملی آرشیف محققلری ینگی قیدیروو تحقیقلری، لکچر و یا پریزینت بیریش اوچون مذکور سالونده معما تاپیلمسدن ارایه قیله آلهدیلر.
تیکا باشلیغی سلیمان شاهین نینگ ایتیشیچه، تورکیه دولتی افغانستان اوچون کیلهجکلرده ییریک لایحه و برنامهلر نظرده و ملی آرشیف سالونی تورکیه دولتی نینگ سونگی یاردمی بولمیدی، بلکیم مذکور آرشیف امکاناتلریگه آرتیریش اوچون تورکیهنینگ محققلری افغانستان کیلیب، بو آرشیف کمچیلیکلرینی برطرف ایتیشگه اولگورهدیلر.
تورکیه دولتی نینگ ملکی و تخنیکی دفتری (ATIK) میلادی 2004- ییل افغانستانده قوریلیب و شوییلدن حاضرگه قدر ایریم بولیملرده فعالیت قیلیب کیلماقده.
تیکانینگ کوپلب فعالیتلری ساغلیکنی سقلش، معارف و قیته قوریش بولگن. حاضرگه قدر ساغلیکنی سقلش بولیمیده کسلخانه و کلنیکلر، معارف اوچون مکتب و معلم تربیهلش بنالر، قیته قوریش بولیمیده سرکلر، کوپریکلر مسجد و تاریخی بنالر قوریش یانیده، افغانستان تاریخیده یشنهگن پارلاق سیمالر جملهدن امیرعلیشیرنوایی، ظهیرالدین محمدبابر، گوهرشاد بیگیم، پروفیسور غلام محمد میمنگی، کاتب هزاره، مولاناجلالالدین محمد بلخی و باشقهلر حیاتی و ایجادیاتی حقیده احتفاللر آلیب مقاله و رسالهلر اوقیش امکانیتینی یرهتگن.
بوندن نیچه آی مقدم کابلده تیکا دفتری 250 یتیم بالهلرگه زمانوی باش پنه قوریش ایشینی بالشهگن ایدی. ایتیلیشیچه، مذکور یتیم خانهدن ایش آلینیشی بیلن کابلده حیات کیچیرهدیگن کوپلب یتیم بالهلر معماسی حل ایتیلهدی.
