عادل آته‌لیک تیزیم ظلمی‌نی یخشی بیله‌دی. زوره‌وانلیک طعمی‌نی یخشی بیر شکلده تارتگن. نیچه مرته سینگلی‌لریدن دفاع قیلیش اوچون آته‌سی و ایناغه‌لری‌نینگ آیاغی آستیده ییقیلیب و سینگلی‌لری‌نینگ ناله و زارینی کورگن. بیراق، حاضرگچه عایله ارزش‌لری بیلن بولگن کوره‌ش میدانی‌دن آیاق تارتمه‌گن.
بیراق، عادل‌نینگ آته‌سی ایسکی و سنتی ارزش‌لرگه جدی شکلده ایشانیب باغله‌نیب قالگن و هیچ قچان اوزینی اوزگرتیره‌آلمه‌یدی. تورموش اورتاغی‌گه اویی‌دن چیقیش‌گه رخصت بیرمه‌یدی؛ اونینگ ایتیشیچه: «عیال اوی ده یا گور ده» بولیشی لازم. بوندن کوره یمان، قیزلری‌نینگ درس اوقیش‌گه رخصت بیرمه‌یدی. عادل‌نینگ سینگلی‌لری سوادسیز قالگن.
او، نیچه مرته بیر عیال اوقوتووچی یاردمی بیلن سینگلی‌لریگه سواد اورگه‌تیش اوچون قرار قیلگن. بیراق عادل‌نینگ ایتیشیچه، آته‌سی اوقوتووچی، مکتب، بیلیم، کتاب و اوقیش‌نی ایستمه‌ی و دینی بیلیم‌دن باشقه هر بیر بیلیم‌نی قیمت‌سیز و یمان دیب بیله‌دی.
عادل آته‌سی‌گه قرشی ایشانچی بیلن هر بیر عیال انسان صفتیده بیلیم اورگه‌نیب، ایرکین یشه‌ب و کیله‌جکی اوچون اوزی قرار قیلیشی‌نی ایته‌دی. عادل‌نینگ ایتیشیچه، آته‌سی بیلن آنه‌سی‌نی جوده هم سیوه‌دی، بیراق آته و آنه‌سی‌گه بولگن سیوگی سینگلی‌لریگه قرشی بوله‌دیگن ظلم‌دن اوستون بوله‌آلمه‌یدی.
بیراق، عادل‌نینگ بو ایشانچی اونگه قیین توشگن. او، بو سیاستی بیلن برچه‌نی اوزیگه قرشی قیلگن. عایله‌سی اوندن اوزاق بولیب و باشقه اونی عایله اعضاسی صفتیده تانیمه‌یدیلر.
عادل، سینگلی‌لریگه حق سوره‌ش اوچون نیچه مرته ناراضیلیک بیلدیریب و آچلیک‌که اعلان قیلگن. اونینگ ایتیشیچه، آتی فاش ایتیلیشی‌نی ایستمه‌گن بیر شهرده خیمه تیکیب و بو ایش بیلن سینگلی‌لریگه بوله‌دیگن ظلم‌نی میدیاگه چیقرماقچی بولگن. بیراق، بو ایش‌لر عایله‌سیده‌گی ایرکک‌لرنی اوزگرتیره‌آلمه‌گنی باعث، عادل اوی و عایلهسینی ترک ایتیب شهردن چیقگن.
یالغیز قیزلرنی اورگه‌تیش و تربیه‌لش قیین‌چیلیگی عادل نینگ اویی و عایلهسینی ترک ایتیشی‌گه سبب بولمه‌گن. آته‌سی و ایناغه‌لری‌نینگ ظلمی منطقه خلقی‌نی هم اچیق‌لنتیرگن. آته‌سی محل یشاوچی‌لری تامانیدن دولتی و غیر دولتی ییرلرنی غصب قیلیش‌گه عیب‌لنگن. ایناغه‌لری زوره‌وانلیک و تالان قیلیش‌گه شهرت قازانگن و اوزلری اوچون جزا دوسیه‌سینی یولگه قویگن.
عادل نیچه مرته عایله‌وی مسئله‌لر و آته‌سی بیلن ایناغه‌لری‌نینگ ظلم و ستمی‌نی امنیه قومندانلیگی، باش قاره‌لاوچیلیک اداره‌سی، آق سقال‌لر و قوم بویوک‌لری بیلن شریک قیلگن؛ بیراق، بو ایشلرنی برچه‌سی نتیجه‌سیز قالگن.
اوشبو امیدسیز و ظلم کورگن یاش ییگیت شهرنی بیر چیککه‌سیده چیگل‌لیککه تارتیلیب و کیله‌جک‌ده نیمه ایش قیلیشی‌نی بیلمه‌یدی.
