افغانستان اداری فسادلریگه قرشی کورهشهدیگن اداره «AACN» رسمیلری، میلادی 2016- ییلده طالبان، داعش و محلی زوروان شخصلر ننگرهار کانلریدن ناقانونی شکلده ایشلب چیقاریشیده 46 میلیون دالر درآمد قولگه کیریتگن دیگن.
اولرنینگ جاری وضعیتدن خواطر بیلدیریب ایتیشیچه، مملکت کانلری اوستیده حکومت حاکم بولمهگن صورتده، حکومتدارلیک و امنیت یمان بولیشی ممکن.
بوگون مذکور ترماق باشلیغی صفیالله پوپل نینگ ایتیشیچه، کانلرنی ناقانونی ایشلب چیقاریش بارهسیده مملکت 34 ولایتیدن قولگه کیلتیرگن تیکشیروولر اساسیده، افغانستان چیگرهلریدن قوشنی اولکهلر و اروپا بازارلریگه کونیده 500 موترده 22500 تُن آق تاش قاچاق قیلینیب آلیب کیتیلهدی.
اوشبو ترماق باشقه بیر اعضاسی ذبیحالله وردک نینگ ایتیشیچه، ننگرهار سابق والیسی یاردمیده کانلر مافیاسی کانلر وزیرلیگیدن 1000 تُن آق تاش ایشلب چیقاریش رخصت نامه سینی آلگن، بیراق قوشنی اولکهلرگه 750000 تُن آق تاشنی قاچاق قیلگنلر.
افغانستانده اداری فسادگه قرشی کورهشهدیگن ترماق اعضاسی نینگ کوپهیتیریشیچه، حکومتده فعالیت قیلهدیگن زوروانلر، مجلس اعضالری، داعش و طالب جنگریلری مملکت کانلریدن ناقانونی شکلده ایشلب چیقارشده اوز نفعلریگه ساتگن.
ننگرهار سابق والیسی سلیم قندوزی نینگ سلام وطندارگه ادعالرنی رد قیلیب ایتیشیچه، مملکت کانلر وزیری «تالک» آق تاش کانلری ایشلب چیقاریش رخصت نامه سینی بیرگن و مذکور تاش قاچاق و ایشلب چیقاریشده قولی بولمه گنلیگینی تیلگه آله دی.
بوبارهده کانلر وزیرلیگی نینگ نظرینی آلماقچی بولدیک، بیراق تکرار تلاشلر بیلن موفق بولمهدیک.
افغانستانده اداری فسادگه قرشی کورهشهدیگن ترماق نینگ قولگه کیریتگن تدقیقاتی گه کوره، بدخشان، خوست، لوگر، پنجشیر، سمنگان و وردک ولایتلریده طالبلر، داعش و زوروان شخصلر کانلرنی ناقانونی چیقاریشدن فایده لنهدیلر.
