دنیا مملکتلریدن کوپینچهسیده عشق و سیوگی کونی شانلی شکلده نشانلنهدی، بیراق افغانستانده سیویشگنلر سیوگیلریگه ییتیشه آلمهگنی باعث، خودکشلیک قیلهدیلر. 25 یاشر صادق و 20 یاشر فاطمه تورموش قوریشلریگه عایلهلری قرشیلیک بیلدیرگنی سبب، بوگون حیاتلریگه نقطه قویگنلر.
سرپل حاکمی سوزلاوچیسی ذبیحالله امانینینگ ایتیشیچه، اوشبو ایکی یاش اوتگن کون مذکور ولایتنینگ سوزمه قلعه تومنی قیشلاق منطقهسیده سیچقان داروسی ییب حیاتلریگه نقطه قویگنلر. سرپل حاکمی سوزلاوچیسیگه کوره، مذکور ایکی یاش ولایت مرکزی کسلخانهسیگه ییتیشیدن آلدین، جان بیرگن.
افغانستانده سنتی رسم و رواج حاکملیگی باعث، یاشلر تونچهلرینی ایستهگنلری کبی عایلهلریگه بیلدیره آلمهیدیلر. عایلهوی قرارلر کوپلب بویوکلر تامانیدن آلینهدی؛ بوندهی بیر فضاده یاشلر عشق و سیوگی توغریسیده آز سوزلهیدیلر. اجتماع ده حاکم سنت و یاشلرنینگ قرارلری و ایستکلریگه دقت سیزلیک باعث، سیویشگنلردن کوپینچهسی یاشیرین شکلده بیر-بیراوی بیلن اوچرهشهدیلر؛ اوچرهشیشلر ایسه باشقهلرنینگ یمان قرهشی، عکسالعملی و شونینگدیک، یمان پیاملرگه سبب بولهدی و سونگی کون سرپلده باشقه بیر یاش طالبان تامانیدن تاش کومدی بولگن.
سلاموطندارگه صحبت بیرگن سرپل حاکمی سوزلاوچیسینینگ ایتیشیچه، باشقه بیر واقعهده بوگون سرپل شهرینینگ لغمان منطقهسیده 25 یاشر جمالالدین آتلی بیر یاش ییگیت زناگه عیبلنیب طالبان تامانیدن تاش کومدی قیلینگن. قوراللی طالبلر حاضرگچه بوتوغریده هیچ نرسه دیمهگنلر.
