بامیان ولایتینینگ ورس و پنجاب تومنلری یشاوچیلریدن بیرقطارینینگ ایتیشیچه، ایکی آیدن بویان مذکور تومنلرنینگ ساغلیقنی سقلش مرکزلریده کوکرک، توماو، سویک آغری، ایسیتمه، بیل آغری و ایچکیتمه کسللیکلری اوچون دارو تاپیلمهیدی.
اولرگه کوره، ورس و پنجاب تومنلرینینگ یشاوچیلری، کونده کسللرینی دارولش اوچون مذکور تومنلرنینگ ساغلیقنی سقلش مرکزلریگه مراجعت قیلهدیلر؛ بیراق درمان و داروسیز اویلریگه قیتهدیلر و یا-ده دارولش اوچون کابل گه مراجعت قیلهدیلر.
شونینگدیک، بامیان مدنی فعاللری بو موضوع دن خواطر بیلدیریب ایتیشیچه، موسوم کسللیکلریگه چالینگنلرنینگ رقمی قیشده کوپهیگن و دارو یوقلیگی کسللرنی جدی شکلده تهدید قیلهدی.
بامیان مدنی فعاللریدن بیری امین دانشیارنینگ ایتیشیچه، ساغلیک خذمتلرینی مسؤولیتی «Move» مؤسسهسیدن «AKHS» آقاخان مؤسسهسیگه تاپشیریلگنیدن سونگ، تومنلرده بولگن ساغلیقنی سقلش مرکزلریده ساغلیک خذمتلر جریانی قیینچیلیککه روپهره بولگن.
عین حالده، بامیان ولایتینینگ ساغلیقنی سقلش ریاستی مسؤوللری هم تومنلرده بولگن ساغلیقنی سقلش مرکزلریدن بیرقطاریده دارو یوقلیگینی تصدیقلب ایتیشیچه، بو قیینچیلیکنی نیچه کوندن آلدین «AKHS» آقاخان مؤسسهسی بیلن شریک قیلیب و تیزلیککه بو قیینچیلیک حل ایتیلیشینی سورهگن.
شو توغریده…
غور؛ دارو یوقلیگی باعث، 3 باله و 2 عیال جان بیرگن
بادغیسده دارو و داکتر یوقلیگی باعث، کسللر دارولنیشی اوچون هرات بارهدیلر
جوزجانده داکتر و دارو یوقلیگی سبب 16کیشی هلاک بولگن
سلاموطندارگه صحبت بیرگن بامیان ولایتینینگ ساغلیقنی سقلش ریاستینی سرپرستی محمدحسین اخلاقینینگ ایتیشیچه، «AKHS» آقاخان مؤسسهسی موجود قیینچیلیکنی حل قیلیشی توغریسیده سوز بیرگن.
بو گزارشده بامیان ولایتیده ساغلیک خذمتلری بوییچه فعالیت قیلهدیگن «AKHS» آقاخان مؤسسهسینینگ فکرینی اورگهنیش اوچون علاقه قوردیک؛ بیراق تکراری سعی و حرکتلر نتیجهسیده مؤفق بولمهدیک.
عین حالده، بامیان مدنی فعاللرینینگ ایتیشیچه، ورس تومنینینگ کسلخانهسیده 6 متخصص داکتر و کمیده 60 ساغلیک ایشلاوچیسی آیلیکلری کمهیگنی سبب ایشدن قول تارتگنلر.
ورس و پنجاب بامیان ولایتینینگ جمعیتلی، قیین یوللی و مرکزدن اوزاقده بولگن تومنلریدن دیر و قیش موسومیده قلین قار یاغیشی، بوران و قار کوچیشلری نتیجهسیده بامیان مرکزی گه باغلنهدیگن قتناو یوللری اوزون مدت توسیلهدی و مذکور ایکی تومننینگ یشاوچیلری قیینلیکده حیات کیچیرهدیلر.
