هلمند یشاوچیلری، مذکور ولایتنینگ نادعلی و گرشت تومنلریده طالبلر تامانیدن امنیتی پوستهلر اوستیگه هجوم اویوشتیریلگنیدن خبر بیرهدی. اولرنینگ ایتیشیچه، اوتکن کیچه طالبلر 30 دن آشه موتر بیلن مذکور تومنلردهگی بیرقطار امنیتی پوستهلر اوستیگه هجوم اویوشتیرگن.
2015 میوند قول اردو سوزلاوچیسی محمدرسول زازی، اوشبو خبرنی تصدیقلب، حاضر طالبلر آرقهگه چیکیلگنینی ایتکن. جناب زازیگه کوره، اوشبو گروه و امنیتی کوچلر اورتهسیده یوزبیرگن توقنهشوولر نتیجهسیده طالبلرنینگ بیر قومندانی شامل 18 اعضاسی هلاک بولگن. 2015 میوندن قول اردو سوزلاوچیسینینگ کوپهیتیریشیچه، حاضر منطقهده امنیتی کوچلر بیلن طالبلر اورتهسیده اوروش دوام ایتماقده.
زازینینگ ایتیشیچه، حاضرگه قدر امنیتی کوچلر تلفات کورمهگن.
شونینگدیک هلمند والیسی سوزلاوچیسی عمر زواکنینگ ایتیشیچه، طالبلر اوتکن کیچه ساعت 3 ده گرشک و نادعلی تومنلریدهگی پوستهلر اوستیگه هجوم اویوشتیرگن. اونینگ ایتیشیچه، حاضر هوایی کوچلر حمایتیده تازهلش عملیات باشلگن و وضعیت عادی حالتگه قیتگن.
عین حالده، طالبلر سوزلاوچیلریدن بیری قاری یوسف احمدینینگ ایتیشیچه، توقنهشوو جریانیده 4 امنیتی پوستهنی نظارتگه آلگنلر و اوشبو پوستهلر غنیمتیگه قوشیمچه، 30 دن آرتیق امنیتی عسکر هلاک بولگن.
مذکور هجوم شوندهی بیرحالده یوزبیرهدی کیم، انچه پیت آلدین هلمند والیسی میرزاخان رحیمی، اوشبو ولایت امنیتی تیزلیک یخشیلنیشینی ایتکن ایدی.
