هرات ولایتینینگ محلی بلند مرتبهلی رسمیلری بوگون (سهشنبه) کیچ ساعت بیشده قوراللی طالبلر غوریان تومنینینگ ولسواللیک همده امنیه قوماندانلیگی بناسیگه گروهی هجوم قیلگنیدن خبر بیرگنلر.
هرات پولیس قوماندانلیگی سوزلاووچیسی عبدالرووف احمدینینگ سلاموطندارگه ایتیشیچه، حاضرگچه اوروش وضعیتی افغان ملی کوچلری منفتیگه و تازه نفس کوچلر ولسواللیککه یول آلگنلر.
ایتیلیشیچه، طالبلرنینگ «امیرک» قوماندانی مذکور هجومنی رهبرلیک قیلهدی. غوریان ولسواللیگی یشاووچیلری، ولسواللیک و قوماندانلیک بناسی جنگریلر تامانیدن قورشاوگه آلینگن دیگنلر. اولرنینگ ایتیشیچه، منطقهگه کومکی ملی کوچلر یوباریلمهگن حالده، غوریان ولسواللیگی جنگریلر نظارتیگه اوتیشی ممکن.
مذکور هجوم اوتگن کون ولایتنینگ شیندند ولسواللیگیگه دولت قوراللی مخالفلری هجوم قیلگن بیر پیتده یوز بیرماقده.
هرات ولایت والیسینینگ سوزلاووچیسی احسانالله حیاتنینگ سلاموطندارگه ایتیشیچه، قوراللی طالبلر افغان ملی کوچلری بیلن مقابله قیلیش کوچیگه ایگه ایمس، فقط اهالی ایچیده قورقیش و وحشت ایجاد قیلیش اوچون هجوم قیلهدیلر.
عین حالده، شیندند اهالیسی مذکور ولسواللیکده قتیق اوروش بارلیگی حقیده خبر بیرگنلر؛ اولر، بازاردن تشقری باشقه بوتونلی منطقهلر قوراللی طالبلر تصرفیگه اوتگنلیگینی تیلگه آلگنلر.
مذکور گروه جاری ییل باشلهنیشیدن بویان بیرینچی مرته بوندن اون بیش کون آلدین قندوز ولایتینی تصرف قیلیشگه موفق بولدی. ملی کوچلر ولایتنی قیتهدن اوز ادارهسیگه آلگنلر. اما امنیتی رسمیلر اوشبو ولایت تصرف ایتیلیشی طالبلر کوچلهنیشیگه سبب بولیب مذکور گروه فاریاب، بغلان، بدخشان، لوگر و غزنی ولایتلریده هجوملرینی آشیرگنلر.
