غزنی ولایتی کینگشی‌نینگ نماینده‌لری و مذکور ولایت یشاوچی‌لریدن بیرقطاری‌نینگ ایتیشیچه، طالب‌لر بیلن پاکستان‌لیک متخصص‌لر اورته‌سیده قول قوییلگن کیلیشوو اساسیده، غزنی ولایتی‌نینگ زنخان، واغظ، زرکشان و مقر تومن‌لری کانلری تیزیم شکلده ایشلب چیقاریلیب پاکستان‌گه یوباریله‌دی.
سلام‌وطندار تامانیدن قولگه کیریتیلگن معلومات اساسیده، دستلب اوشبو کانلر قوراللی طالب‌لر تامانیدن تانیلیب و نشانلگنی‌دن کیین، قطار پاکستان‌لیک متخصص‌لر تامانیدن حرفه‌یی شکلده ایشلب چیقاریلیب و بار تاشیدیگن موترلر بیلن چیگره‌نی او تامانی‌گه اوتکزیله‌دی.
غزنی کانلری اوستیگه طالب‌لر حاکمیتی و ناقانونی شکلده ایشلب چیقاریلیشی توغری‌سیده، ولایت والیسی محمدامان حمیمی‌نینگ سلام‌وطندارگه ایتیشیچه، محلی حکومت قولگه کیریتگن معلومات‌لری اساسیده، غزنی ولایتی‌نینگ بیش مهم کانی قوراللی طالب‌لر اختیاریده بولیب و دولت اولرنی باشقریش‌گه قادر ایمس دیر. غزنی والیسی‌گه کوره، محل طالب‌لری پاکستان‌لیک متخصص‌لر همکارلیگی‌ده واغظ، زنخان و مقر تومن‌لریده‌گی کانلرنی ناقانونی شکلده ایشلب چیقاره‌دی و حاضرگچه ایشلب چیقارگن تاشلریدن نیچه موتری‌نی پاکستان‌گه قاچاق قیلگن.
اوشبو قاره پول، قیته‌دن افغانستان‌گه یوباریلیب، جنگری طالب‌لرنی کوچلنتیریش اوچون صرف‌لنه‌دی.
غزنی ولایتی اوزاق منطقه‌لریده حیات کیچیره‌دیگن یشاوچی‌لرنینگ سلام‌وطندارگه ایتیشیچه، طالب‌لر بیلن پاکستان‌لیک‌لر اورته‌سیده قول قوییلگن کیلیشوو اساسیده، افغانستان کانلری‌نینگ تاشلری کم بها بیلن پاکستان متخصص‌لریگه ساتیله‌دی.
ولایتی کینگش‌ده واغظ خلقی‌نینگ نماینده‌سی عبدالجامع جامع‌نینگ ایتیشیچه، قوراللی طالب‌لر ینگی‌لیک‌ده تور قیشلاغی تاغ‌لریده بیر کته کان توغری‌سیده پاکستان‌لیک‌لر بیلن کیلیشوو امضالگن. جناب جامع‌گه کوره، تور قیشلاغی‌ده‌گی کان‌نی قازیش باشلنگن و ایشلب چیقاریلگن ماده‌لرنی انتقال بیریش اوچون محل‌ده کوپینچه موتر یوباریلگن.
غزنی ولایتی کینگشی اعضاسی حسن‌رضا یوسفی‌نینگ ایتیشیچه، مذکور کینگش قوراللی طالب‌لر بیلن پاکستان‌لیک متخصص‌لر تامانیدن غزنی ولایتی‌نینگ کته و قیمت بهالی کانلری ایشلب چیقاریلیشی توغری‌سیده اساسی معلومات قولگه کیریتگن.
جناب یوسفی‌نینگ ایتیشیچه، بو توغریده حکومت تینچ‌لیگی سوراق توغدیره‌دی.
یوسفی‌گه کوره، 94- ییل باشیده، دولت بیلن طالب ناور تومنی گچ کانی ایشلب چیقاریلیشی توغری‌سیده جواز صادر قیلگن؛ بیراق اوشبو کان و زنخان تومنی‌نینگ کانی، حاضر ملا رحمت و ملا داوود بویروغیده‌گی کوچلر تامانیدن تأمین‌لنه‌دی و کونده ایکی کته بار تاشیدیگن موتر کان تاشلرینی لوگر ولایتی خروار تومنی‌گه انتقال بیره‌دی.
غزنی ولایتی کانلر آمری احمدالله حکیمی‌نینگ سلام‌وطندارگه ایتیشیچه، کانلر وزیرلیگی اولرگه مکتوب یوبارگن و اونگه اساس، غزنی ولایتی کانلر آمریتی، مذکور ولایت کانلری ناقانونی شکلده ایشلب چیقاریلیشی توغری‌سیده میدیالرگه معلومات بیرمه‌یدی.
غزنی ولایتی ناور تومنی محل یشاوچی‌لری‌نینگ ایتیشیچه، محل زوره‌وانلری و قوراللی کیشی‌لریدن بیرقطاری‌نینگ، مذکور تومن کانلری ناقانونی شکلده ایشلب چیقاریلیشی توغری‌سیده قولی بار.
افغانستان کانلری ناقانونی شکلده ایشلب چیقاریلیشی و تاشلری مملکت‌دن تشقری قاچاق بولیشی ینگی خبر ایمس؛ بیراق اوتمیش‌لرگه قره‌گنده، کانلرنی ناقانونی شکلده ایشلب چیقاریش عادی و طبیعی مسئله‌گه اوزگرگن. قوراللی طالب‌لر دولت ایچیده‌گی قطار گروه همکارلیگی‌ده، افغانستان کانلری‌نی ایشلب چیقاریب و مملکت‌دن تشقری قاچاق قیله‌دی.
