تورکمنستان گازی نی افغانستان آرقلی جنوبی آسیا بازارلریگه ییتکزووچی گاز قوورینینگ افغانستان حدودیده قوریلیش ایشی جمعه 4 – حوت پاکستان، تورکمنستان، افغانستان و هندوستان بلند مرتبهلی رسمیلری اشتراکیده باشلهتیلدی. مذکور گاز قوورینینگ افغانستان قسمی مملکت غربیده جایلشگن تورکمنستان بیلن چیگرهداش ولایت هراتده باشلهتیلدی.
تاپی دیب ناملنووچی اوشبو لایحه افغانستان، هندوستان، پاکستان و تورکمنستان همکارلیگیده عملده تطبیق ایتیلهدی. یقینده تاپی گاز قوورینینگ تورکمنستان قسمی قوریب بیتکزیلگنی بارهسیده خبر بیریلگن ایدی.
افغانستان رهبری محمد اشرف غنی، تورکمنستان جمهور رییسی قربانقلی بیردی محمدوف، پاکستان باش وزیری شاهد خاقان عباسی و هندوستاننینگ تشقی ایشلر بوییچه دولت وزیری جمعه کونی محلی وقت بیلن توشدن آلدین تورکمنستاننینگ سلیم چشمه منطقهسیده تشکیل ایتیلگن مراسمده قتنهشیب تاپی گاز قوورینینگ تورکمنستان حدودیده قوریب بیتیریلگنینی اولکن موفقیت دیب بهالهدیلر.
افغانستان جمهور رییسی محمد اشرف غنی مذکور دولتلر بلند مرتبهلی رسمیلری بیلن هرات ولایتی مرکزیده اویوشتیریلگن ییغینده قیلگن چیقیشیده تاپی گاز قوورینی منطقه ترقیاتی کریدوری دیب ناملهدی. عین حالده او تاپی گاز قوورینی افغانستان حدویده قیسقه مدت ایچیده قوریلیشی بارهسیده اوشبو لایحه شریکلریگه ایشانچ بیلدیردی.
مذکور ییغینده تورکمنستان جمهور رییسی قربانقلی بیردی محمدوف، پاکستان باش وزیری و هندوستاننینگ تشقی ایشلر بوییچه دولت زیری هم سوزگه چیقیب تاپی لایحهسینینگ عملده تطبیق ایتیلیشینی منطقه خلقلری حیاتی گه ایجابی اوزگریش آلیب کیلیشی اوستیده تاکیدلهدیلر. تورکمنستان جمهور رییسی انرژی منبعلریگه بای مملکتینی منطقه دولتلری ترقیاتی یونهلیشیده حصه قوشیشلیککه تیار ایکنینی معلوم قیلدی.
ایشلب چیقیریلگن ریجه اساسیده تورکمنستاننینگ دولتآباد منطقهسیدن آلیب هندوستاننینگ فاضیلکا منطقهسی آرهلیغیده 1800 کیلو متردن آشهراق مسافهده قوریلیشی نظرده توتیلگن اولکن گاز قوورینی قوریش ایشی 2019 ییلی اوز نهایه سیگه ییتکزیلهدی. مذکور قوورافغانستان حدودیده 700 کیلو متردن آشهراق مسافهده قوریلهدی و هر ییلی اوشبو قوور آرقلی 33 میلیارد متر مکعب دن آشهراق گاز تورکمنستان منبعلریدن افغانستان، پاکستان و هندوستان گه ییتکزیب بیریلهدی.
افغانستان هر ییلی تاپی گاز قووری ترانزیتی حسابیدن کمیده 4 یوز میلیون دالر درآمد قولگه کیریتهدی.
تاپی لایحهسی برابریدهگی توسیقلر
تاپی لایحهسی برابریده افغانستانده دوام ایتهدیگن ناتینچ وضعیت جدی بیر توسیق ایکنی ایتیلهدی. انه شو مسئله اوزاق ییللردن بیری تاپی بیلن علاقهدار تامانلرنی تشویشلنتیریب کیلگن ایدی. افغان رسمیلری مذکور لایحه خوفسیزلیگینی تامینلشده ضروری چارهلر کورگن لیکلرینی ایتهدیلر. عین حالده طالبلر تامانی ترقتگن بیاناتده تاپی گاز قووری خوفسیزلیگی گه طالبلر طرفیدن برهم بیریلمسلیگی قید ایتیلگن.
در واقع طالبلرنینگ اوشبو بیاناتی افغانستانده تاپی گاز قوورینینگ قوریلیش ایشی مولجللنگن وقتیده بیتکزیلیشی بارهسیده امید بیرهدی. بوندن آلدین بیر قطار کوزهتووچیلر تاپی منطقوی لایحهسینی افغانستانده برقرارلیک اورنهتیلیشی اوچون مهم بیر عامل بولیشی ممکنلیگی بارهسیده هم بشارت بیریب کیلگن ایدیلر.
تاپی گاز قووری تیز آره ده عملده تطبیق ایتیلیشی گه پاکستاننینگ منفعتدارلیگی هم مذکور لایحهنی خوفسیز بیر شکلده عملگه آشیریلیشی گه بالقوه کفالت حسابلنهدی. نیگه دیگنده افغانستانده دولت گه قرشی جنگ قیلهدیگن قوراللی گروهلر اینیقسه طالبلر پاکستان تامانیدن حمایه ایتیلهدی. پاکستان مذکور گروهلرنی پاکستان منفعتلری نی تأمینلشده سفربر ایتیشی طبیعی بیر حال البته.
تاپی منطقه اقتصادی رواجی گه خذمت قیلهدی
معلوم که مرکزی آسیا جملهدن تورکمنستان گاز، نفت و برق منبعلریگه بای بیر حدود حسابلنهدی. جنوبی آسیا دولتلری اینقسه پاکستان و هندوستان اوزاق مدتلردن بیری برق همده یانیلغیگه محتاج.
پاکستان و هندوستان اوزاق ییللردن بیری مرکزی آسیادهگی انرژی منبعلریگه کوز تیککن. چونکه مذکور منبعلردن فایدهلنیش بو ایکی مملکت اوچون بیر تاماندن ارزان گه توشهدی و باشقه تاماندن مرکزی آسیا منبعلریدن جنوبی آسیاگه انرژی نی تَشیش قولهی و آسان.
کیلهسی اوچ ییل دوامیده تورکمنستان گازی افغانستان آرقلی هندوستان و پاکستان گه ییتکزیب بیریلگنده هندوستان و پاکستان صناعتی چانلنهدی. مذکور دولتلر اهالیسینینگ گازگه بولگن احتیاجی قسماً برطرف ایتیلهدی.
افغانستان رهبری محمد اشرف غنی مرکزی آسیا بیلن جنوبی آسیا آرهسیده تاپی یگانه اقتصادی لایحه ایمس لیگینی تاکیدلهدی. اونگه کوره تاپی عملده تطبیق ایتیلیشی بیلن بیلن بیرگه اوشبو یونهلیشیده باشقه بیر قطار مهم اقتصادی پروژهلر بیرین کیتین عملگه آشیریلهدی.
محمد اشرف غنی تورکمنستان تیمیر یولینی افغانستاننینگ هرات، فراه، قندهار، نیمروز و هلمند ولایتلری آرقلی سپین بولدک بندرگاهی یونهلیشی بیلن پاکستاننینگ تیمیر یولی ترماغی همده مذکور تیمیر یولنی نیمروز ولایتی آرقلی ایراننینگ چاهبهار بندرگاهی گه باغلنیشی بارهسیده مژده بیردی. اونگه کوره بو بیلن بیرگه تاپ 500 لایحهسی اساسیده تورکمنستان منبعلریدن افغانستان و پاکستان گه کته مقدارده برق ییتکزیب بیریلهدی.
مرکزی آسیا دولتلری همده ختای اوشبو یونهلیش آرقلی نورلی فیبر بیلن جنوبی آسیاگه باغلنهدی.
اوشبو مهم لایحهلرنی عملده تطبیق ایتیلیشی کیلهسی ییللر ایچیده منطقه اقتصادی رواجلنیشی همده منطقه یشاوچیلری حیاتیگه ایجابی رول اوینهیدی.
