طالبلر رهبری ملا اختر محمد منصور، قربان بیرهم هییتی اوچون بیرگن پیامیده، اوتمیشلرده تشقی مملکتلرنینگ میلیونی یاردملرینی «وقتینچهلیک و الدنچاغلیک» بیلیب ایتیشیچه، اوشبو مملکتلر اوتکن 14 ییلده افغانستان اوچون هیچ بیر اساسی ایش قیلمهگن.
بیراق، اونگه کوره، دنیاجماعهچیلیگی افغانستانده ایچکی قرهمه قرشیلیکلرنی کوپهیتیریش و فکری بوزغونچیلیکلر اوچون کوپینچه فعالیت لرنی عملگه آشیرگن.
سیاسی ایش بیلرمانلردن بیری فاروق بشر، طالبلرنینگ اوشبو ادعاسینی تأیید قیلیب ایتیشیچه، دنیاجماعهچیلیگی بیرینچیدن افغانستانده مارشال ریجهسی و باشقه کته اساسی ریجهلرنی عملی قیلیشگه سوزبیرگن ایدی، بیراق اوشبو وعدهلردن هیچ بیری عملگه آشمهگن. جناب بشرگه کوره، دنیاجماعهچیلیگی تامانیدن بیریلگن پول، یالغیز بیرقطارلرنی ثروتمند قیلگن.
«سهشنبه» کون طالبلر گروهی رسمی وبسایتیده نشر ایتیلگن پیامده منصورنینگ ایتیشیچه، اوروش طالبلرگه تحمیل بولگن و امیریکه رهبرلیگیدهگی بیرلشیک، افغانستاننی «اشغال» ایتکن.
شونینگدیک منصورنینگ ایتیشیچه، امیریکهلیکلر و ناتو عضوی بولگن مملکتلر، افغانستانده عسکرلری اولیشیدن پند آلیب و استعماری سیاستلریگه قیته تیکلشلری لازم.
اختر منصورنینگ پیامیده کیلیشیچه، افغانستان حکومتی یالغیز تینچلیک شعار بیرهدی و تینچلیککه ایریشیش خصوصیده بولگن اساسی شرط کابل- واشینگتن ارا امنیتی شرطنامه لغو ایتیلیشی و تشقی کوچلرنی افغانستاندن چیقیشی دیر.
شونینگدیک طالبلر رهبری، کابل حکومتینی، افغانستان خلقی اورتهسیده قومی، مذهبی، سمتی و تیزیم تعصبلر ایجاد ایتیشگه عیبلیدی.
منصور، مملکت یشاوچیلریدن، افغانستاننی تجزیه قیلیش خصوصیده «افغانیت» و «اسلامیت» مسئلهلرینی برجسته قیلهدیگن گروهلرگه دقت قیلیشلرینی سورهدی.
شونینگدیک فاروق بشرنینگ ایتیشیچه، بیرقطارلر تینچلیک یوکسک کینگشیده و بیرقطارلر هم حکومت ایچیده، تینچلیک تأمینلنیشینی ایستمهیدی.
اوشبو سیاسی ایش بیلرمان، ملا منصور پیامینی تینچلیک سوزلشوولرگه زمینه یرهتیش خصوصیده چانه اوروش بیلیب ایتیشیچه، طالبلرنینگ تینچلیک سوزلشووی توغریسیدهگی شرطی کابل- واشینگتن ارا امنیتی شرط نامه لغو ایتیلیشی و تشقی کوچلرنینگ مملکتدن چیقیشی بولگن صورتده، افغانستان سیاسی حیاتیگه دوام بیرهآلمهیدی.
بیراق، سیاسی ایش بیلرمان و بیلیم یورت استادی لطیف نظری، طالبلر تامانیدن قوییلگن شرطنی افغانستانده مذکور گروه هجومی شدتلنیشی خصوصیده بیر بهانه دیب بیلهدی. جناب نظرینینگ ایتیشیچه، تشقی کوچلر افغانستاندن چیقیب و طالبلرگه طرفدار مملکتلر منفعتی عملی بولمهگن صورتده، اوتمیش لردیک طالبلر تهدیدی دوام ایتیشی ممکن.
طالبلر رهبری، مذکور گروه اورتهسیده قرهمه قرشیلیکلر موجود دیگن خبرلرنی شایعه دییدی.
اونینگ ادعا قیلیشیچه، طالبلر گروهی افغانستان شمالیدهگی اوروشده یوتوقلر قولگه کیریتکن و چیت ایللیکلر، طالبلر ادارهسیده بولگن منطقهلرنی تهدید صفتیده کورسهتیب، قوشنیلرنی اولرگه دشمن قیلیش خصوصیده سعی و حرکت قیلهدی.
منصورنینگ پیامیگه کوره، طالبلر باشقه فعالیتلر یانیده، سیاست خصوصیده هم سعی و حرکت قیلهدی، اوشبو گروهنینگ قطردهگی دفتری شو توغریده ایجاد ایتیلگن و بو دفتر هر بیر تامان بیلن مذاکره قیلهآلهدی.
ملا منصورگه کوره، دینی و عصری تعلیمات مملکت ینگی نسلی اوچون جدی و اساسی احتیاجلردن دیر. شونینگدیک، اوز ادارهلریده بولگن منطقهلرده دینی و عصری تعلیماتلرگه زمینه یرهتیلیشی خصوصیده بویروغ بیرگن.
بیراق، طالبلر بوندن آلدین، مملکت ایریم منطقهلریده اونلرچه مکتبنی اوتگه یاندیرگن. شونینگدیک اوشبو گروه حاکم بولگن چاغیده، قیزلرنینگ مکتب باریشیگه توسیق بولگن.
لطیف نظریگه کوره، حاضرگی طالبلر اوتکن بیر یریم دهه طالبلریدن فرق قیلهدی. جناب نظرینینگ کوپهیتیریشیچه، منطقهیی اوزگریشلر اینیقسه داعش گروهی ظهوری، طالبلر حرکتی اوزگریشیگه سبب بولگن.
بیراق، اوشبو گروه جنگریلری ینگیلیکده، بغلان ولایتی دندغوری منطقهسیدهگی مکتب لرده «مدنی تعلیمات و مدنی» مضمونلرنی درسی کتابلر ایچیدن چیقارگن.
