.jpg)
جوزجان ولایتیده آتی فاش ایتیلیشی‌نی ایستمه‌گن محلی بیر منبع نینگ سلام‌وطندارگه ایتیشیچه، طالبان گروهی قوش‌تپه تومنی نینگ ملی خوفسیزلیک مدیری سیراکبرآغا بیلن 4 امنیت و 4 پولیس عسکرنی اولدیرگن.
منبع گه کوره، قوش‌تپه تومنی طالبان گروهی نینگ قولی‌گه سقوط قیلگن چاغیده، بو عسکرلر طالبان نینگ مقابلی‌ده مقاومت قیلگن‌لری باعث، اولدیریلگن.
اوشبو خبرنی تصدیقلگن جوزجان پولیس قومندانی عبدالواحد وجدان نینگ ایتیشیچه، قوش‌تپه تومنی نینگ ملی خوفسیزلیک مدیری باشقه 8 عسکر بیلن طالبان گروهی نینگ پیستیرمه‌سیده هلاک ایتیلگن.
جوزجان پولیس قومندانی نینگ ایتیشیچه، طالبان گروهی قوش‌تپه تومنی اوستیگه هجوم قیلگن چاغیده اسیر آلگن امنیتی کوچلردن بیرقطاری نی قوییب یوبارگن.
طالبان گروهی بو توغریده هیچ نرسه دیمه‌گن. قوش‌تپه تومنی اوتگن دوشنبه کیچه طالبان گروهی نینگ قولی گه سقوط قیلگن ایدی.
جوزجان ولایت کینگشی اعضالری گه کوره، مذکور تومن اوستیگه طالبان گروهی تامانیدن اویوشتیریلگن هجوم ده امنیتی کوچلردن 17 ته‌سی هلاک ایتیلگن و باشقه 45 ته‌سی یره‌لنگن و اونلرچه عسکرهم طالبان تامانیدن اسیر آلینگن.
طالبان گروهی اوتگن کون هم 42 حربی عسکرنی قوییب یوبارگن ایدی.
عین حالده، جوزجان امنیتی و محلی مسؤوللری، قوش‌تپه تومنی قیتریب آلینیشی خصوصیده حربی عملیات یولگه قوییلیشی اوستیگه تأکید قیله‌دی، بیراق قوش‌تپه تومنی سقوط قیلگنیدن تورت کون اوتماقده و بو عملیات حاضرگچه باشلنمه‌گن.
شو توغریده…
قوش‌تپه ده طالبان تامانیدن اسیر آلینگن 42 عسکر قوییب یوباریلدی
