بغلان کې یوې باوري سرچینې سلاموطندار ته ویلي چې د دې ولایت د ګلغونډۍ او تالهوبرفک ولسوالیو او بامیان ولایت سره په نښتو سیمو کې د ډبرو سکرو ۴ کانونه د طالبانو په لاس کې دي او د سیمې اوسېدونکیو په وسیله یې وباسي.
په همدې حال کې د بغلان ولایتي شورا رییس محمدصفدر محسیني هم مني چې د دې ولایت ټول کانونه د طالبانو تر ولکې لاندې سیمو کې دي. نوموړی وايي، طالبان د دې ولایت د کانونو په اېستلو کې لاس لري او حکومت باید د دوی ترڅنګ، د هغو کسانو مخه هم ونیسي چې دغه ولایت کې د مهمو پروژو د پلي کېدو مخه نیسي.
بلخوا د بغلان امنیې قومندان هم مني چې طالبان تر خپل واک لاندې سیمو کې کانونه راوباسي او وايي دولت د تالهوبرفک ولسوالي له لارې په مرکز او یوشمېر نورو سیمو واکمن دي.
خو په شمال کې د ډبروسکرو د تصدۍ رییس عبدالوکیل حمیدي وايي، سره له دې چې طالبان د دې ولایت په ځینو سیمو کې د دوی د کار پهوړاندې خنډ ګرځي، خو تراوسه د هغوی له لوري د ډبروسکرو کان اېستلو په اړه ورته راپور رسېدلی نهدی. د نوموړي په وینا، په تالهوبرفک ولسوالي کې ۱۵ نیمه تجهیز شوې زېرمې شته چې د دوی په لاس کې دي.
دا په داسې حال کې ده چې د بغلان ولایت تالهوبرفک ولسوالي څو ځله د حکومت او طالبانو ترمنځ لاسپهلاس شوې ده.
د راپورونو له مخې طالبان له هغو موټرو پیسې اخلي چې د دې ولایت له کانونو د ډپرو سکاره لېږدوي، خو په شمال کې د ډبروسکرو د تصدۍ رییس دا موضوع ردوي.
