د افغان دولت او طالبانو ترمنځ د بندیانو د تبادلې پر دوام، په قطر کې د طالبانو د سیاسي دفتر ویاند سهیل شاهین ویلي چې پرون یې په هرات کې د دولت ۲۸ بندیان خوشې کړي دي.
طالب ډلې ویلي چې د بندیانو د تبادلې له پیل راهیسې یې ۱۸۰ بندیان په کندهار، لغمان، کندوز، بادغیس او هرات ولایتونو کې خوشې کړي دي. خو افغان دولت د ۱۲۳ کسانو خوشې کول تایید کړي او ویلي یې دي چې طالبانو یوشمېر ملکیان د امنیتي ځواکونو په نوم را خوشې کړي دي.
ولسمشر غني د لوړې مراسمو پر مهال وویل چې سولې ته د ښه نیت ښودلو او د کورونا ویروس د مخنیوي په موخه به د ۵۰۰۰ طالب بندیانو د خوشې کولو فرمان صادر کړي. د دغه فرمان له صادرېدو راهیسې زر طالب بندیان په ۱۲ پړاوونو کې خوشې شوي دي.
د ملي امنیت شورا ویاند جاوېد فیصل څو ورځې وړاندې وویل چې طالبان باید د افغانانو د وژلو لړۍ ودروي او ژر تر ژره له افغان دولت سره د سولې مخامخ خبرو ته چمتو شي. نوموړي ویلي چې د مخامخ خبرو ځنډول هېڅ ډول توجیه نه لري او د خلکو د وژل کېدو لامل کېږي.
خو طالبان بیا د خپلو ۵ زره بندیانو پر خوشې کولو ټینګار کوي. د امریکا او طالبانو ترمنځ د سولې هوکړهلیک له مخې، ټاکل شوې وه د دې ډلې ۵ زره بندیان او زر هم د افغان دولت خوشې شي، خو تر اوسه دا کار نه دی شوی.
