د ټاکنو له اعلانېدو نږدې دوه اوونۍ وروسته ناټو په یوه اعلامیه کې له افغان سياسيونو غوښتي چې د سولې له پروسې ملاتړ وکړي.
خبرپاڼه کې د ناټو د سرمنشي له قوله ليکل شوي چې د افغانستان د ولسمشریزو ټاکنو د وروستیو پایلو په تړاو ویلي چې په دې اړه هر ډول اندېښنې باید د اساسي قانون له مخې حل شي.
د ناټو د سرمنشي ينس سټولټنبرګ پر ټولو افغان سیاسيونو د داسې ګامونو د نه اخيستو غږ کړی چې ترینګلتیا ډېروي او سیاسي ټیکاو کمزوری کوي.
د ناټو سرمنشي د تېرو ټاکنو پر مهال د افغانانو ګډون ستايلی چې په ټاکنو کې په ګډون یې خپل ډیموکراټيک حقونه وازمایل.
د ناټو په خبرپاڼه کې له ټولو افغانانو غوښتل شوي چې د سولې بهیر ملاتړ وکړي او ملي یووالی وساتي.
د خبرپاڼې په وینا، اوس دا وخت دی چې ټولې مسوولې سیاسي کړۍ خبرې پیل کړي او د سولې هغه بهیر ته سره یو موټی شي چې د ټولو افغانانو لومړیتوب دی.
د ناټو د خبرپاڼې پای کې ویل شوي چې دغه سازمان د اوږد مهال لپاره د افغانستان د امنیت او ټیکاو لپاره ټینګه ژمنتیا لري چې په وینا یې دوی به د افغان امنیتي ځواکونو روزنې او مالي ملاتړ ته دوام ورکوي چې له ترهګرۍ سره مبارزه وکړی شي او سولې ته زمینه برابره شي.
ناټو په داسې حال کې د سياسيونو پر يووالي او د يو پر بل منلو غږ کوي چې د دولت جوړوونکي او ثبات او همپالنې ټاکنيزې ډلو ترمنځ کړکېچ اوج ته رسېدلی دی او دواړه ټيمونه د تحليف مراسمو ته چمتووالی نيولی و.
خو د امريکا د بهرنيو چارو وزارت تېره ورځ ناوخته د يوې خبرپاڼې په خپرولو سره وويل چې د تحليف مراسم وځنډېدل. امريکا له افغان دولته دې لپاره مننه کړې چې د تحليف مراسم يې وځنډول.
