د فاریاب د ولایتي شورا رییس محمدطاهر رحماني وايي، دوه کسان چې په طالبانو پورې تړلي، د دغه ولایت په میمنې ښار کې یوه جومات ته ورغلي او پر لمونځکوونکو یې ډزې کړې دي.
دا پېښه بېګاه ماښام د فاریاب ولایت د مرکز میمنې اړوند په بيبيایینه سیمه کې شوې ده.
د رحماني په وینا، په یاد برید کې درې لمونځکوونکي وژل شوي او ۵ نور ټپیان دي.
د فاریاب د ولایتي شورا رییس وايي، په وژل شویو کې یو محلي قوماندان او دوه یې ساتونکي دي.
په همدې حال کې یوه محلي سرچینه چې نه غواړي نوم یې یاد شي، سلاموطندار ته ویلي چې په یاده پېښه کې ۵ لمونځکوونکي وژل شوي او څو نور ټپیان دي.
د فاریاب ولایتي امنیتي مسوولان په دې اړه خبرو کولو ته حاضر نه شول.
طالبانو تر اوسه په دې اړه څه نه دي ویلي.
