د تخار په خواجه بهاالدین ولسوالي کې ځینې سرچینې وايي چې طالبانو په دغې ولسوالي کې یو ښوونځی سوځولی او د ملک احمد تاتار په ګډون یې د یوشمېر کسانو کورونه لوټ کړي دي.
دغه سرچینه چې نه غواړي نوم یې یاد شي، سلاموطندار ته ویلي چې طالب جنګیالیو نن سهار «په لالهګذر» ولسوالي کې د یوه ښوونځي تحویلخانه سوځولې او بیا یې د ملک احمد تاتار په ګډون د یوشمېر کسانو کورونه لوټلي دي.
په یاده ولسوالي کې ځینې نورې سرچینې وايي، طالبانو د دغه ښوونځي تحویلخانه ځکه سوځولې چې په څنګ کې یې د ولسوالي پاڅونوال سنګر و. د سرچینې په وینا، طالبان د خواجهبهاالدین ولسوالي د مرکز تر یوکیلومترۍ پورې رسېدلي دي.
د تخار محلي او امنیتي مسوولانو تر اوسه په دې اړه څه نه دي ویلي. خو په دغه ولایت کې یوه امنیتي سرچینه وايي، په خواجهبهاالدین ولسوالي کې د افغان ځواکونو په هوايي بریدونو کې له ۳۰ ډېر طالب وسلهوال وژل شوي دي.
د طالب ډلې ویاند ذبېحالله مجاهد ویلي چې په یاده ولسوالي کې د ښوونځي سوځول او د خلکو د کورونو لوټل د دوی کار نه دی.
دا په داسې حال کې ده چې پرون په تخار کې ځینو سرچینو وویل چې طالبانو د خواجهبهاالدین ولسوالي ځینې برخې نیولي دي. د سرچینې په وینا، د ملک احمد تاتار په مشري ولسي پاڅونوال د طالبانو پر وړاندې جګړه کوي.
