چارواکي وایي چې بېګاه شپه لسګونو طالبانو د میدان وردګو ولایت د جلرېز ولسوالۍ پر امنیتي پوستو بریدونه کړيدي.
د میدان وردګو ولایتي شورا غړي شریفالله هوتک سلام وطندار ته وویل چې له سختې جګړې وروسته د عامه نظم ۱۱ پوستې د طالبانو لاس ته لوېدلي او طالبانو شاوخوا ۹۰ امنیتي سرتېري له وسلو او تجهزاتو سره وړي دي او امنیتي پوستې یې سوځولې دي.
د میدان وردګو د والي ویاند عبدالرحمن منګل سلام وطندار ته وویل چې له میدان وردګو، لوګر، غزني او هلمند ولایتونو سلګونو طالبانو د جلرېز ولسوالۍ نیولو لهپاره راټول شوي او پر امنیتي پوستو یې بریدونه کړي.
ښاغلی منګل زیاتوي چې دغه بریدونه پر شا تمبول شوي او تراوسه پهکې ۵ طالبان وژل شوي او لسګونه نور ټپیان دي.
د والي ویاند وایي، اوس هم په جلرېز ولسوالۍ پوځي عملیات روان دي.
طالبانو تراوسه پورې پهدې اړه رسنیو ته څه نهدي ویلي.
