طالبانو نن سهار ۱۰ بجې په بغلان کې ۶ هندي اتباعو په ګډون د برېښنا یو قراردادي شرکت ۷ تنه کارکوونکي تښتولي دي.
سرچینې وايي، د برېښنا شرکت دا کارکوونکي هغه مهال د طالبانو د یو سرګروپ قاري نورالدین له لوري په د پلخمري شمالي باغ ساحه کې تښتول شوي چې د پلخمري خواجهالوان برېښنا سبسټېشن په لوري روان وو.
په بغلان کې د غوري برېښنا ریاست یوې سرچینې د نوم نه ښودلو په شرط ویلي، تښتول شوي کسان د « KEC» قراردادي شرکت اړوند دي.
د بغلان ولایتي شورا مرستیال فېروزالدین ایماق سلاموطندار ته وویل، دغه کسان نن شاوخوا ۱۰بجې تښتول شوي دي.
ښاغلی ایماق د بغلان امنیتي وضعیت نه اندېښنه څرګندوي او له دفاع او کورنیو چارو وزارتونو غواړي د دغه ولایت امنیتي ځواکونو ته لا زیات تجهیزات واستوي.
د بغلان امنیې قوماندانۍ ویاند ذبیح الله شجاع وايي، د طالبانو یو قوماندان قاري شاهین دغه هندي انجینیران او د هغوی افغان همکار تښتولي او د پلخمري ډنډ شهابالدین اړوند واصغري سیمې ته یې لېږدولي دي.
د بغلان پولیسو ویاند ټینګار کوي د تښتول شویو کسانو موندلو او خوشې کولو لهپاره د پولیسو هڅې پیل شوي دي.
طالبانو تراوسه پورې په دې اړه څه نه دی ویلي.
د پلخمري دشت خواجه الوان برېښنا سب سټېشن جوړولو چارې د تېرکال په وروستیو کې د اوبو او برېښنا وزیر له لوري پرانیستل شوې.
دغه سب ستیشن د اسیا پرمختیايي بانک له مرستو د ۴۹.۷میلیون امریکايي ډالرو په لګښت د هندي KEC کمپنۍ له لوري جوړیږي.
ویل کېږي د دغه سب ستیشن ۵۰ سلنه چارې بشپړې شوي خو د امنیتي ګواښونو له امله پڅې پرمخ ځي.
دغه سب ستیشن د ۴۰۰ مېګاواټه برېښنا تولید ظرفیت لري چې په بشپړېدو سره به یې بغلان او کابل کې د برېښنا کموالي ستونزه حل شي.
