د بغلان ولایت د تاله او برفک ولسوال فیض محمد امیري سلام وطندار ته وویل، د دغه ولسوالۍ د انګار کلي د جومات د ملا له خوا چې فیض الله نومېږي، په بې رحمانه ډول خپله مېرمن وژلې ده.
نوموړی وايي، چې دا پېښه تېره شپه د (اګسټ په ۳۱مه) رامنځته شوې ده او لامل یې له ښځو سره کورنی تاوتریخوالی ښودل شوی دی.
امیري وايي، چې ملا فیض الله ۴ کاله وړاندې په تخار ولایت کې له دې مېرمنې سره واده کړی و او څو اولادونه یې هم لرل.
دغه وژنه د طالبانو تر کنټرول لاندې سیمه کې شوې ده. دا پېښه په داسې حال کې کېږي، چې څو ورځې وړاندې د بغلان په مرکزي ولسوالۍ کې یو مېړه له خپلې ښځې سر غوڅ کړی و.
تېره ورځ هم په غور ولایت کې یو ځوان هلک او نجلۍ د ناوړه اړیکو د لرلو پر تور ۱۰۰ دورې ووهل شول، دغه تورن کسان د عامو خلکو په حضور کې د جومات د ملا له لوري په دورو ووهل شول او وروسته یې کورنیو ته وسپارل شول.
