د کندوز ولایت د سیمه ییزو پولیسو مسوولین وايي، وسله والو طالبانو د یک شنبې په شپه شاوخوا یوه بجه د ښار درېیمې امنیتي حوزې اړوند زاخېلو سیمه کې د سیمه ییزو پولیسو په پوستې برید کې ۶ پولیس یې وژلي او یو یې ټپي کړی دی.
د سیمه ییزو پولیسو د دې پوستې قوماندان شریف الله د برید پرمهال کور کې و.
نوموړي سلام وطندار ته وویل، چې وسله والو طالبانو لومړی له پوستې د باندې ۴ پولیس اسیر نیولي او وروسته د مرستندویه ځواکونو په نوم پوستې ورداخل شوي او ۲ نور پولیس یې په پوسته کې وژلي دي.
دی واي، چې طالبانو څلور نیول شوي پولیس د چهاردرې سیند ته څېرمه په ګولیو ویشتلي دي.
شریف الله زیاته کړه، طالبانو ۶ میله کلاشینکوف، یو راکټ او یوه پیکا هم له ځانه سره وړي دي.
خو د کندور ولایتي شورا غړي صفي الله امیري سلام وطندار ته وویل، د دې پوستو یو پولیس طالبانو سره اړیکې لرلې؛ د پیرې پرمهال یې خپل ۶ سنګروال وژلي او یو یې ټپي کړی دی.
د ده، په خبره، دغه نفوذي عسکر له طالبانو سره یو ځای شوی دی.
په ورته وخت کې طالبانو د یوې اعلامیې په خپرولو سره ویلي، چې د زاخېلو سیمه کې د سیمه ییزو پولیسو په پوستې برید کړی؛ ۸ عسکر وژلي او مهمات یې له ځانه سره وړي دي.
هڅه مو وکړه، چې په دې اړه د کندوز امنیې قوماندان نظر هم واخلو؛ د پرلپسې اړیکو سره بریالي نه شو.
شاوخوا څلور میاشتې مخکې هم د کندوز په مرکز کې د ملي اردو په یوې پوستې د طالبانو برید کې ۹ تنه سرتیري وژل شوي وو.
