د کندوز ولایت سیمه ییز چارواکي وايي، چې وسله وال طالبان، جندالله ډله، القاعده شبکه، پاکستاني ترهګر او چچني وسله وال پر کندوز د ستر برید تیاری کوي.
د دوی په خبره، په دې ولایت کې شاوخوا ۴ زرو ترهګرو، چې ۵۴ عرادې "هاموي" زغروال موټر هم ورسره دي د کندوز د نیولو له پاره یو لاس شوي دي.
د کندوز ولایت والي اسدالله عمرخېل د بهرنیو ځواکونو له قوماندانه په دې ولایت کې د ترهګریزو ډلو سره د موجودو نظامي تجهیزاتو د له منځه وړلو او د دوی د برید د فعه کولو له پاره هوايي مرسته غوښتې.
په افغانستان کې د امریکايي ځواکونو او قاطع ملاتړ ماموریت قوماندان جنرال نیکلسون د جرمني او هالنډ هېوادونو له سیفرانو او په افغانستان کې د ملګرو ملتونو سازمان له استازي سره نن (دوشنبه) کندوز ولایته تللي وو.
دوی په دې سفر کې له والي، ولسوالانو او قومي مخورو سره د ښې حکومتولۍ، د امنیت ټینګښت او د بیارغونې په برخه کې خبرې وکړې.
د لیدنې په پای کې جنرال جان نیکلسون وویلې، چې دوی به پرې نږدي، چې وسله وال طالبانو یو ځل بیا کندوز ونیسي او زیاته یې کړه، چې د افغان امنیتي ځواکونو سره به له هېڅ ډول مرستې سپما ونه کړي.
دغه امریکايي جنرال په کندوز ولایت کې د بې پولې ډاکټرانو د روغتون په اړه وویل، چې ژر ټر ژره به دغه روغتون ورغوي.
په دې غونډه کې د جرمني هېواد سفیر د روغتیا، ښوونې او روزنې، ښې حکومتولي او د شمال ختیځو ولایتونو د اوبو خور په برخه کې په خپلو ژمنو ټینګار وکړ.
دا په داسې حال کې ده، چې طالبانو د عمري عملیاتو له پیل سره سم د کندوز د نیولو له پاره پراخ ډله ییز برید وکړ، خو افغان امنیتي ځواکونو ماته ورکړه.
