د چارو یوشمېر شنونکي وایي، د طالبانو او ځینو حکومتي چارواکو فعالیتونه او څرګندونې ښيي چې دواړه لوري په جګړه او سوله کې خپلې ګټې ویني او د همدې لپاره د سولې خبرې اترې اوږدوي.
دوی وایي، سره له دې چې په قطر کې د مرکچي پلاویو د تماس ډلې وایي، د مذاکراتو په کړنلاره کې پرمختګ شوی او ژر به یې چارې بشپړې شي، خو د شاوخوا لسو ورځو په تېرېدو سره لا هم کړنلاره نه ده وروستۍ شوې.
د چارو شنونکی فدامحمد نظري وايي، په خبرواترو کې ځنډ ښيي چې دواړه لوري نه غواړي د سولې مذاکرات په لنډه موده کې یوې پایلې ته ورسېږي.
د هغه په وینا، طالب مشران په قطر کې له امریکایانو نه ډیرې پیسې ترلاسه کوي او حکومت هم غواړي چې خپله کاري موده وغځوي.
سره له دې چې یوشمېر هېوادوال د طالبانو له لوري د نښتو زیاتېدل د سولې خبرو ته د دې ډلې نه ژمنتیا بولي، خو د چارو شنونکی محبالله شریف وایي، طالبان تر یوه بریده د سولې خبرو ته ځانونه ژمن بولي او د حکومت او چارواکو پر وړاندې داسې څرګندونې نه کوي چې د سولې پر خبرو ناسم اغېز وکړي.
د شریف په وینا، ځینې حکومتي چارواکي، په تېره د ولسمشر مرستیالان په روانو حساسو شرایطو کې د قومونو ترمنځ بېلوالي ته لمن وهي او دا ډول څرګندونې د سولې پر وړاندې د خنډ جوړولو په مانا دي.
هغه زیاتوي، سره له دې چې هېڅ لوری د سولې خبرو مخه نه شي ډپ کولی، خو په وینا یې، د دغو خبرو ځنډولو لپاره هم هڅې روانې دي.
په همدې حال کې طالبانو د ولسمشر غني د مرستیالانو د وروستیو څرګندونو پر وړاندې غبرګون ښودلی دی.
طالبانو په یوه اعلامیه کې ویلي، د حکومت لوړپوړي چارواکي د سولې ضد پلان له مخې د دوی په اړه ناسمې څرګندونې کوي او د راتلونکي اسلامي نظام پر وړاندې هم عقدهيي چلن کوي.
افغان دولت او طالبانو تر دې وړاندې هم یو بل د سولې پروسې پر وړاندې پر خنډ جوړولو تورن کړي دي.
دا په داسې حال کې ده چې د افغان سولې د دواړو لوریو تر منځ لا هم په قطر کې د سولې خبرواترو د طرزالعمل او د اجنډا بشپړولو لپاره خبرې دوام لري.
