جمهورلیک ریاستی سیلاوی 7 کون آلدین یولگه قوییلدی، بیراق سیلاو حساس ملزمه‌لری بیرقطار ولایت‌لردن کابل‌گه انتقال بیریلمه‌گن و بو موضوع سیلاودن نظارت قیلیووچی نهادلر و جمهورلیک ریاستی نامزدلرینی خواطرلنتیرگن دیر.
افغانستان بوییچه ایرکین و عدالت‌لی سیلاو بنیادی یا-ده فیفا باشلیغی یوسف رشید نینگ سلام‌وطندارگه ایتیشیچه، سیلاو حساس ملزمه‌لرینی انتقال بیریلیش لایحه‌سی طولانی بولگنی قطار شبهه‌لرنی اورته‌گه چیقارگن.
افغانستان بوییچه شفاف سیلاو بنیادی یا-ده تیفا سوزلاوچیسی صغرا سعادت نینگ سلام‌وطندارگه ایتیشیچه، سیلاو کمیسیونی، سیلاودن آلدین بیرگن وعده‌لریگه عمل قیلمه‌گن و حاضرگه‌قدر آواز بیرووچی‌لر ارقامی‌نی تعیین ایتیلگن زمانده اعلان قیلیش‌گه موفق بولمه‌گن.
خانم سعادت‌گه کوره، سیلاو حساس ملزمه‌لری نینگ انتقال بیریلیشی دوام قیلگنی سیلاو کمیسیونی ایش‌لری خصوصیده شبهه‌لرنی کوپه‌یتیرگن.
بوگون "شنبه" سیلاو ایرکین کمیسیونی اعضاسی مولانا عبدالله نینگ کابلده بیرخبری ییغین آرقه‌لی ایتیشیچه، بایومتریک اسکونه‌لرنینگ کابل‌گه انتقال بیریلمه‌گنی سبب، حاضرگچه تفکیک لایحه‌سی باشلنمه‌گن.
سیلاو ایرکین کمیسیونی سوزلاوچی‌لریدن بیری ذبیح‌الله سادات نینگ سلام‌وطندارگه ایتیشیچه، حاضرگه‌قدر مملکت 27 ولایتیدن سیلاو حساس ملزمه‌لری کابل‌گه انتقال بیریلگن و بوگون آقشام گچه بو لایحه یکونلنه‌‌دی. اونینگ ایتیشیچه، سیلاو اساس ملزمه‌لری ملی بیر پلان اساسی‌گه انتقال بیریله‌دی.
بایومتریک اسکونه‌لری و نتیجه فورم‌لری سیلاو اساس ملزمه‌لری جمله‌سیدن دیر. جمهورلیک ریاستی سیلاوی بیرهفته آلدین یولگه قوییلدی و اوشبو سیلاو ابتدایی نتیجه‌سی 27 میزان و نهایی نتیجه‌سی 16 عقرب‌ده اعلان ایتیلیشی ممکن.
