بیر قطار افغانستانلیک سیاسی ایش بیلرمانلر پاکستان استخبارات اداره سی بیلن ترورچیلیککه قرشی کوره‌شیش اوچون قول قوییلگن کیلیشوو توغریسیده خواطر بیلدیریب، مذکور کیلیشوو گه قول قوییلیشی افغانستان ملی منفعت لریگه ضد بولگن لیگینی ایتگنلر.
افغانستان ملی خوفسیزلیک باشقرمه سی نینگ اورین باسری بوندن اوچ کون آلدین پاکستان استخبارات اداره‌سی بیلن جاسوسلیک معلومات‌لرنی المشتیریش اوچون بیر کیلیشوو گه قول قویگن.
مذکور کیلیشوو گه ملی امنیت باشقرمه‌سی نینگ بیرینچی اورین باسری تامانیدن قول قوییلگنی ایتیله‌دی.
اوشبو شرطنامه گه کوره، پاکستان استخبارات ریاستی افغانستان ملی امنیت خادملریگه حربی تعلیمات بیریب تجهازله‌شی ممکن.
شونینگ‌دیک اوشبو کیلیشوو اساسیده ایکّی مملکت نینگ استخبارات اداره‌سی بیرگه لیکده عصیانچیلیککه قرشی کوره‌شه دیلر.
جمهور رییس نینگ سوزلاوچی‌سی اجمل عابدی نینگ ایتیشیچه، ایکّی دولت اورته‌سیده قول قوییلگن معلوماتی اوشبو کیلیشوو ینگی بیر مساله ایمس، اوشبو دولت لرنینگ جاسوسلیک اداره‌سی بوندن آلدین هم بیری- بیراویگه تورلی ساحه لرگه یاردم بیریب کیلگن.
عابدی، بو کیلیشوو گه اساساً ایکّی مملکت ترورچیلیککه قرشی کوره‌شیش لرینی تیلگه آلگن.
جمهور رییس سوزلاوچی‌سی نینگ طلوع نیوز ترماغی گه ایتیشیچه، افغانستان سیاستی ایکّی دولت اوچون هم دالضرف موضوع حسابلنه دی انه شو باعث افغانستان و پاکستان جاری سیاستنی سیزیب بیرگه لیکده ترورچیلیککه قرشی کوره‌شه‌دی. دیمک، افغانستان و پاکستان هر دایم امنیتی نطقه نظردن جدی تهدیدلر بیلن روپه ره بولگن.
بیراق، مملکت حربی ایش بیلرمانی عتیق الله امرخیل نینگ مذکور کیلیشوو خصوصیده ایتیشیچه، افغانستانگه بوندن آرتیق خیانت بولمه‌یدی.
او، افغانستان و پاکستان استخبارات اداره‌سی اورته‌سیده قول قوییلگن کیلیشوو توغریسیده خواطر بیلدیریب سلام وطندارگه ایتیشیچه، هیچ بیر مملکت هیچ قنده‌ی بیر شرایط‌ده بونده‌ی بیر کیلشووگه قول قویمه‌یدی.
اوشبو حربی ایش بیلرمان نینگ سوزلریگه قره‌گنده، هر بیر مملکت نینگ برچه سرلی معلوماتی استخبارات اداره‌سی قولیده بوله‌دی، بونده‌ی بیر کیلیشووگه قول قوییش حقیقت‌دن افغانستاننی پاکستانگه تاپشیریش دیر.
امرخیل نینگ کوپیتیریشیچه، بیر مملکت نینگ استخباراتی معلوماتی باشقه بیر دولت جاسوسلیک اداره‌سی اختیاریده بولگن تقدیرده، او مملکت اوز ایرکین لیگینی قولدن بیرگن سنله‌دی.
باشقه تماندن ملی کینگش نماینده‌لری دوشنبه کونگی عمومی اولتیریشده مذکور کیلیشوو گه قول قوییلگن‌لیگینی تنقید قیلیب، اونی افغانستان ملی منفعتی‌گه قرشی دیگنلر.
افغانستان پارلمانی نینگ بیرینچی اورین باسری ظاهر قدیر، بو توغریده جواب بیریش اوچون ملی امنیت مسؤوللری و خوفسیزلیک کینگشی نینگ مصلحت چیسی مجلس گه چقیریلیشینی تیلگه آلگن.
شونینگ‌دیک مجلس نماینده‌لریدن باشقه بیری مولوی عبدالرحمان رحمانی نینگ ایتیشیچه، بونده‌ی بیر کیلیشووگه قول قوییش افغانستاننی پاکستان گه تاپشیریش دیر.
عین حالده، حربی ایش بیلرمان لردن باشقه بیری کابل خان تدبیر سوزلریگه کوره، بو کیلیشووگه قول قوییلیشی افغانستان ملی منفعت لریگه قرشی بولیب، افغانستان، پاکستان نینگ بیر بولیمیگه اوزگره‌دی.
پاکستان بوندن آلدین هم افغانستان حکومتی‌گه ایریم بولیم لرگه همکارلیک قیلیش توغریسیده وعده بیرگن، بیراق حاضرگه قدر بو باره ده عملده هیچ قنده‌ی آدیم کوتارمه گن.
افغانستان سابق جمهور رییسی حامدکرزی حکومتی، هردایم پاکستان استخبارات ریاستینی ترورچیلرنی حمایت ایتیش‌گه عیب‌لب کیلگنلر. لیکن، بو ادعالر پاکستان تامانیدن رد ایتیلگن.
اما ملی بیرلیک حکومتی تشکیل ایتیلیب ایش‌گه باشله‌گنیدن کیین، جمهور رییس غنی حکومتی علاقه‌سی پاکستان بیلن یخشی بولیشی توغری سیده جدی سعی و حرکت لر آلیب بارماقده.
