آخیرگه کیلیب تورخم چیگره یولی ایکّی کون اوچون ( سهشبنه و چهارشنیه حوت آیی نینگ 17-18) کونلری یولاوچیلر یوزیگه آچیلهدی. رسمی اسلام آباد، بو توغریدهگی قرار پاکستاندهگی ویزهلی افغانلر مملکتلریگه قیتگونگه قدر آلینگن لیگینی ایتگن.
پاکستان اوچون افغانستان نینگ ایلچیسی عمر زاخیلوال، چیگرهده قالگن یولاوچیلر اوشبو مدت ایچیده افغانستانگه اوتیشی ممکن دیگن.
شونینگدیک زاخیلول، چیگره دایمی شکلده افغانستانلیکلر یوزیگه آچیق حالتده توریشی اوچون افغانستان حکومتی نینگ آلیب بارگن سعی وحرکتلری هنوزگچه نتیجه آلیب کیلمهدی دیگن.
سونگی بیر آی ایچیده پاکستان نینگ ایریم شهرلریده انتحاری هجوملر عملگه آشیریلگندن سونگ سپین بولدک، تورخم و غلامجان چیگرهلری پاکستان حکومتی آرقهلی افغانستان فقراسی یوزیگه یاپیلدی.
تورخمدن گزارش بیرگن سلاموطندار رادیوسی نینگ خبرچیسی، پاکستانلیک حربیلر حتی ویزهسی بولگن افغانستانلیکلردن هم چیگرهدن اوتیش اوچون پاره آلهدی دیگن.
دوالهنیش نیتده اسلام آبادگه بارگن افغان خلقی، ایریم پیتلرده پاکستان چیگرهچیلری کسللردن پاره آلمهگونگه قدر، چیگرهدن اوتیشگه رخصت بیرمسلیگینی تیلگه آلگنلر. اوشبو یولاوچیلر، پاکستاندهگی افغانستانلیک قاچقینلرنینگ احوالی جوده آغیرلیگی حقیده خواطر بیلدیرگنلر. اولر، پاکستان حکومتی کون – ساین بو مملکتدهگی افغانلر اوچون یشش شرایطنی قیسقرتیریب بارماقده دیگنلر.
پاکستاندن کیلگن یولاوچیلر، بو مملکتده استقامت قیله دیگن مهاجرلر چیگره آچیلیشینی کوتیب تورگنلر دیدیلر. یولاوچیلرنینگ سوزیگه قرهگنده، چیگره آچیلیشی بیلن افغان قاچقینلری اوز وطنیگه قیتهدی.
مملکت تشقی ایشلر وزیرلیگی سوزلاووچیسی نینگ اورین باسری خیرالله آزاد، تورخم چیگرهسی آچیلیشی اوچون آلیب باریلگن سعی وحرکتلر نتیجهسیده چیگره ایکّی کونگهقدر افغانلر یوزیگه آچیلیشیدن خبر بیرگن.
شونینگدیک جناب آزاد، افغانستان و پاکستان اورتهسیده گی چیگره دایمی شکلده آچیق توریشی اوچون ایکّی مملکت نینگ رسمیلری هنوزگچه هم بوتونلی کیلیشهآلمهگنلر دیگن.
