.jpg)
اوتگن بیر کیچه-کوندوز ده هلمند، فراه، هرات، قندهار، لوگر و نورستان ولایتلری تکرارسیز یامغیر و سوو تاشقینلری گه گواه بولگنلر.
قندهار ساغلیقنی سقلش مسؤوللرینینگ ایتیشیچه، اولرنینگ قولگه کیریتگن رقملری اساسیده، سپینبولدک تومنیده سوو تاشقینی باعث، 7 کیشی هلاک و باشقه 8 کیشی یرهلنگن. اولرگه کوره، قربان بولگنلرگه عیاللر و بالهلر شامل دیر.
هلمند حاکمینینگ سوزلاوچیسی عمر زواکنینگ ایتیشیچه، لشکرگاه شهریده سوو تاشقینلر یوز بیرگنی باعث، 6 کیشی جان بیریب و باشقه 8 کیشی یرهلنگن.
مذکور سوو تاشقینلر فراه ولایتی یشاوچیلریگه کوپینچه مالی زیان ییتیشتیرگن.
فراه حاکمینینگ اورین باسری موسی نظرنینگ ایتیشیچه، حاضرگهقدر سوو تاشقینلر خساراتیدن بیلی ارقام یوق؛ بیراق خسارت میزانی یوقاری دیر.
فراه مدنی فعاللریدن بیری جاوید تابش نینگ ایتیشیچه، اوتگن کیچه یوز بیرگن سوو تاشقینلر یوزلرچه مسکونی اوی، دکان و ایکینچلیک ییرلرنی تخریب قیلگن.
عینحالده، هرات ولایتیده طبیعی واقعهلرگه قرشی کورهش اداره باشلیغی حمیدالله مبارز حمیدینینگ ایتیشیچه، اوتگن 24 ساعت جریانیده یوز بیرگن سوو تاشقینلر مذکور ولایتنینگ شیندند، زیرکوه، پشتکوه، ادرسکن، پشتونزرغون و چشت تومنلرینینگ یشاوچیلریگه مالی زیان ییتکیزگن.
.jpg)
باشقه بیر تاماندن، هرات حاکمینی سوزلاوچیسی جیلانی فرهادنینگ ایتیشیچه، شیندند تومنیده یوز بیرگن سوو تاشقینلریده 2 کیشی هلاک و باشقه یوزلرچه اوی بوزیلگن.
اونینگ کوپهیتیریشیچه، تیکشیرووچی تیرمه جماعهلر سوو تاشقینلریدن زیان کورگن منطقهلرگه یوباریلگن و تیکشیروولردن سونگ، زیان کورگن عایلهلرگه یاردم بیریلهدی.
شونینگدیک، چشت تومنینینگ سرپرستی حیاتالله متوکل نینگ ایتیشیچه، مذکور تومنده یوز بیرگن سوو تاشقینلریده 150 چاروا قربان بولگن و باشقه 300 اوی و اونلرچه جریب ایکینزار ییر زیان کورگن.
