افغانستان باشکینتی کابلده لوگر مدنی جماعهچیلیک ادارهسی نینگ باشلیغی و پکتیا ولایتی بوییچه انسان حقوقی فعاللریدن بیری درکسیز یوقالگنلریدن کمیده بیر هفته اوتگنیدن سونگ، بوگون ملی خوفسیزلیک ادارهسی نینگ اعلان قیلیشیچه، مذکور کیشیلر ملی خوفسیزلیک ریاستی نینگ تورمهخانهسیده بولگن. اوشبو ریاست نینگ ایتیشیچه، لوگر مدنی جماعهچیلیک ادارهسی باشلیغی نینگ معلوماتی ناتوغری ایکن.
ملی خوفسیزلیک عمومی ریاستی نینگ مطبوعات دفتری بیر خبرنامه نشر قیلیب یازیشیچه، «جناب محمودی نینگ صحبتلری جریانیدن چیققن موضوعلر اونینگ معلوماتی حجتسیز، اثباتسیز و گواهسیز بولگنینی کورسهتیب و ناتوغری شکلده خاص بیر ماجرا ایجاد قیلیب و اوندن سونگ، چیتایللیک مملکتلردن بیری ده عایلهسی اوچون باشپناهلیک سورهش نیتیده عملگه آشیریلگن.»
لوگر مدنی جماعهچیلیک ادارهسی نینگ باشلیغی محمدموسی محمودی و پکتیا ولایتی بوییچه انسان حقوقی فعاللریدن بیری احسانالله حمیدی، لوگر مدنی جماعهچیلیک ادارهسی تامانیدن تیارلنگن بیر گزارش نشر قیلینگنیدن سونگ، اوتگن هفته پنجشنبه کون باشکینت کابلده ملکاصغر تورت یولی و صدارت آرهسیده بولگن یولدن درکسیز یوقالیشگن.
عین حالده، افغانستان بوییچه انسان حقوقیدن مدافعه قیلووچی کمیته، مملکت انسان حقوقی و مدنی فعاللرگه قرشی ینگی تهدیدلر و باسیملردن خواطر بیلدیرگن.
بوگون «سهشنبه، 5- قوس» مذکور کمیته نینگ اعضالری، کابلده خبری بیر ییغین اوتکزیب ملی خوفسیزلیک عمومی ریاستی تامانیدن اوشبو ایکی کیشی قولگه آلینگنیدن تنقید قیلیب ایتیشیچه، محکمه حکم بیرمسدن قولگه آلیش قانون گه قرشی دیر.
اولر، حکومت نینگ بو ایشینی سوز ایرکینلیگینی چیکلاولنتیریش دییشگن.
مذکور کمیته بیر اعلامیه صادر قیلیب ایتیشیچه، جناب محمودی و حمیدی، لوگر ولایتی نینگ بالهلری گه قرشی بولگن جنسی زوروانلیکلردن پرده کوترگنلریدن سونگ، محلی سیاستچیلر تامانیدن اجتماعی ترماقلر آرقهلی جدی تهدیدلرگه دوچ کیلیشگن.
افغانستان بوییچه انسان حقوقیدن مدافعه قیلووچی کمیته اعضاسی کبرا بلوچ نینگ ایتیشیچه، تیزلیککه لوگر مدنی جماعهچیلیک ادارهسی نینگ باشلیغی و پکتیا بوییچه انسان حقوقی فعالی نینگ تقدیرلری بیللی بولیب و حکومت اولرنینگ جان خوفسیزلیگی و ایرکینلیگیدن ایشانچ بیریشی کیرهک.
غور مدنی فعاللریدن بیری محمدحسن حکیمی، لوگر مدنی جماعهچیلیک ادارهسی نینگ باشلیغی و انسان حقوقی فعاللریدن بیری، حکومت تامانیدن قولگه آلینگنلرینی انسان حقوقی و مدنی فعاللرنینگ ایستهگی گه قرشی بیلیب ایتیشیچه، اوشبو مسئله بوندن کیین انسانیت گه قرشی جنایت و انسان حقوقی نقض ایتیلگنی گه قرشی کیمسه سیس چیقاریب و فاش ایته آلمهسی گه سبب بولهدی.
افغانستان بوییچه مدنی جماعهچیلیک ترماغی یا-ده مجما باشلیغی عزیز رفیعی نینگ ایتیشیچه، جزالنتیریشدن کیچیریش مدنیتی حاکم بولگنی باعث، مملکتده انسان حقوقی و مدنی فعاللر هردایم تهدید و خطرگه دوچ کیلیشهدی.
شونینگدیک، انسان حقوقی ایرکین کمیسیونی، ملی خوفسیزلیک ریاستی تامانیدن محمدموسی محمودی و احسانالله حمیدی قولگه آلینگنینی ناقانونی بیلیب و اولر تیزلیککه قوییب یوباریلیشینی سورهگن.
کمیده ایکی هفته آلدین بریتانیالیک گاردین کوندهلیگی نینگ گزارش بیریشیچه، لوگر مدنی جماعهچیلیک ترماغی، 546 بالهدن جنسی سوءاستعمال قیلیش گه مسؤول بولگن بچهبازلر ترماغیدن پرده کوترگن و بو گزارش ایسه، جدی عکسالعمللرگه روپهره بولدی.
لوگر مدنی جماعهچیلیک ادارهسی باشلیغی محمدموسی محمودی نینگ گاردین کوندهلیگی گه ایتیشیچه، بو تدقیقات نی 6 آیده جریانیده لوگر مرکزی ده 6 مکتب اوقووچیلری و شهرده بولگن قطار ایشلاوچی اوسمیر بالهلر بیلن صحبت اوتکزیب تیارلگن.
اوشبو گزارش اساسیده، بیش عایله بالهلری نینگ ویدیولری اجتماعی ترماقلرده نشر ایتیلگنیدن سونگ، اولرنی اولدیرگن. بونگه علاوه، زیان کورگن کمیده 25 باله اوی و جایلرینی ترک قیلیشگه مجبور بولیشگن.
افغانستان معارف وزیرلیگی، بو ادعالرنی تیکشیریش اوچون بیر هیأت تعیین قیلدی و شونینگدیک، نمایندهلر کینگشی بو موضوع جدی شکلده تیکشیریلیب و حقیقت بیللی بولیشی اوچون بیر هیأت تعیین قیلگن.
شو توغریده…
