بوگون فاریاب ولایتی میمنه شهریده اونلب معارف ساحه سیده فعالیت قیله دیگن مدنی نهادلر اعضالری و اهالی اعتراضلی ییغین اوتکزیب معارف وزیرلیگیدن اوزبیک تیلی درسلیک کتابلری چاپ ایتیلیشینی طلب قیلگنلر.
اعتراضچیلر، معارف وزیرلیگی 7- صنفدن یوقاری صنفلر درسلیکلرینی چاپ ایتیش جریانینی توختهتیشنی دوام ایتدیرگن تقدیرده، کینگ ناراضیلیک نمایشلرگه قول اوروشلری بیلن آگاهلنتیرهدیلر.
اولر، درسلیک کتابلری چاپ ایتیلمسلیگیگه مذکور وزیرلیک اوزبیک تیلینی کم سیته یاتگنلیگیگه عیبلیدیلر.
فاریابده فعالیت قیله یاتگن ایشانچ اجتماعی وفرهنگی انجمنی ومدنی فعاللر تمانیدن یولگه قوییلگن ییغیندن مقصد، ییتینچی صنفدن اون بیرینچی صنف گچه اوزبیک تیلی درسلیک کتابلری نیچه ییلدن بیری معارف وزیرلیگی تمانیدن چاپ ایتیلمه گنیگه قرهتیب اعتراض بیلدیریش ایدی.
اشتراکچیلردن بیرقطاری صحبتگه چیقیش قیلیب، افغانستان معارف وزیرلیگیدن اوزبیک تیلی درسلیک کتابلری چاپ ایتیلیشینی طلب قیلگنلر.
اولر، اوتگن ییللرده بوتیلگه عاید کتابلر چاپ ایتیلمه گنیگه وزیرلیکنی بی تفاوت قیلگنلیکده عیبلهدیلر.
احتفالده فاریاب معارف ریاستی باشلیغی غلام سخی بیان مکتب کتابلریگه بولگن معمالرنی تصدیقلدی، اما او قولیدن کیلگونچه بو ساحهده سعی وحرکت قیلیشینی وعده بیردی.
بو ییغین اخیریده اشتراکچیلر تاماندن قطعنامه اوقیلیب، قطعنامهده معارف وزیرلیگیدن اوزبیک تیلی کتابلری آلتینچی صنفدن اون بیرینچی صنفگچه تیزلیکده چاپ ایتیلیشی جدی طلب قیلینگن. شونینگدیک ملت وکیللری، معارف ریاستی و ولایت رسمیلری بوخصوصده توجه قیلیب، اولرنینگ طلبلرینی مرکزگه ییتکزیشی سورهلگن. عین حالده بو قطعنامهده «معارف وزیرلیگی مدنی نهادلر و اهالی نینگ قانونی طلبلریگه توجه قیلمهگن تقدیرده» یوکسک ناراضیلیک نمایشی اویوشتیریب مملکت شمال وشمال شرقیدهگی معارف دروازهلرینی یاپیشلری ممکنلیگی بیلن آگاهلنتیردی.
بوندن آلدین هم فاریاب ولایتیده مدنی نهادلر و یشاوچیلری«اوزبیک تیلی اوز اوییده بیگانه» عنوانی آستیده ییغین اوتکزیب دولتدن بوتیل رونقی و اونیب اوسیشی بارهسیده توجه قیلینیشینی طلب قیلگن ایدیلر.
