باشکینت یشاوچیلریدن بیرقطاری، یشش اویلر یانیده نمایشی بلندمنزللر قوریلیشی کوپهیگنیدن تنقید قیلیب و بولر شهری استندردلرگه قرشی و رخصتسیز قوریلگن دییدیلر. اولرنینگ ایتیشیچه، بو بلندمنزللر قوریلیشیده کیفیتسیز قوریلیش مادهلردن فایدهلنهدی.
باشکینت یشاوچیلری کابل شهردارلیگیدن تنقید قیلیب ایتیشیچه، نمایشی بلندمنزللر قوریلیشی یشش اویلرنینگ ایگهلری اوچون یشش فضاسینی تار قیلهدی و اهالی ایسه مجبوریت دن اویلرینی ارزان ساتیب و باشقه ییرگه کیتهدی.
کابل شهردارلیگینینگ شهر رواجلنتیریش و پلانتیارلاوچی اورین باسری صدرالدین نینگ ایتیشیچه، شهردارلیک ادارهسی غیرمعیاری شکلده بلندمنزل قورگنلر بیلن قانون اساسیده یاندهشهدی.
شهر قوریش و ییر بوتونلیک وزیرلیگی سوزلاوچیسی حشمت ناصری نینگ ایتیشیچه، مذکور وزیرلیک جاری ییلده دولتی و عامهوی بنالرنی ریجهلشتیرووچی مرکز ایجاد قیلهدی.
جناب ناصری نینگ ایتیشیچه، شهر قوریش وزیرلیگی، مذکور وزیرلیک چارچوبهسیده شهرسازلیک ساختهکارلیکلریگه قرشی کورهش اداره ایجاد قیلهدی و بو اداره ایسه شهرلرده غیرمعیاری قوریلیشلرگه توسیق بولهدی.
کابل یشاوچیلری بوندن آلدین هم ناقانونی و غیرمعیاری بلندمنزللر قوریلیشیدن تنقید قیلیب و بو توغریده قانون اساسیده یاندهشیلیشینی طلب قیلگن ایدیلر؛ بیراق کورینیشیچه حکومت رسمیلری بوتوغریده اونچهلیک دقت قیلمهگن.
