د کانونوـ پټرولیم وزارت او سوداګرۍ خونې د دوشنبې پر ورځ کابل کې جوړې شوې غونډه کې د سوداګرۍ خونې مرستیال خان جان الکوزي له حکومه وغوښتل، هغه خام مواد چې په هېواد کې پيداکیږي باید هغې ته وده ورکړي.
دده پر خبره، د تدارکاتو پیچلی سیسټم د کانونو په تړونونو کې د ځنډ لامل شوی دی.
نوموړي زیاته، چې ستونزې د تړونونو دي دولت ژمن دی چې دغه بهیر له تدارکاتو را وباسي او دغه بهیر ساده کړي د هغه پر خبره شاوخوا ۲ کاله کیږي، چې تړونونه بند دي او که دا کار وشي، نو په دغه برخه کې به ۵۰ سلنه ستونزه هوارېدای شي.
الکوزی له حکومته غواړي، چې د ډبرو سکارو تړونونه چې په دې برخه کې لږه پانګونه شوې باید سوداګرو ته ورکړل شي تر څو هېواد کې فعال تولیدي شرکتونه فعالیت وکړي.
د افغانستان د ډبرو سکارو د ټولنې رېیس حیات الله نصرت عزیزي د عوایدو لوړیدو په برخه کې د مالیې وزارت په طرحه نیوکه وکړه.
« مالیې وزارت هڅه کوي چې د جریمو له لارې دولت ته بودیجه جوړه کړي موږ وايو چې باید پياوړي اقتصادي سیاستونه په پام کې ونیول شي کارموندنه وشي د ماليي وزیر هغه مهال فعال وزیر دی چې د عوایدو، مالیاتو له مخې وزارت ته بودیجه جوړه کړې نه د جریمو له لارې.»
په همدې حال کې د کانونو او پټرولیم وزارت سرپرسته نرګس نهان وايي، چې دوی د سوداګرو اوصنعتکارانو د ستونزو هواري په موخه په دغه وزارت کې د تعدیل پر طرحه کار کوي او زیاتوي، چې پر دې کار سره به د تدارکاتو او تړونونو بهیر کې اسانتیاوې رامنځته شي.
د کانونو او پټرویلم سر پرست زیاتوي، چې دغه وزارت یو کمېسیون جوړ کړی، چې د کانونو په برخه کې د اړونده شرکتونو په تړاو پریکړه وکړي.
د کانونو او پټرویلم وزارت چارواکي د کانونو په برخه کې د ټولو شرکتونو غواړي، چې خپلو شرکتونو کار کوونکي او ماشینرۍ په بشپړه توګه دغه وزارت کې ثبت کړي، تر څو له دغو شرکتونو سره د تړونونو پرمهال له ستونزو سره مخ نه شي.
