ټاکل شوې راتلونکې اوونۍ په سعودي عربستان کې د افغانستان د سولې او ثبات راوستلو په موخه د اسلامي هېوادونو د دیني عالمانو نړۍوال کانفرانس جوړ شي.
د سعودي عربستان پریس اژانس د راپور لهمخې، یاد نړۍوال کانفرانس به د روانې جولای میاشتی په ۱۰مه او ۱۱مه نېټو د سعودي عربستان په پلازمېنه ریاض او مکه مکرمه کې ترسره شي چې په ترڅ کې به یې په افغانستان کې د سولې او ټیکاوو راوستلو په موخه ترهګري د اسلام سره په ټکر کې یاده او وبه غندل شي.
په دغه کانفرانس کې به له افغانستان څخه هم د عالمانو څلوېښت کسیز پلاوی سعودي عربستان ځي او د نړۍ له بېلابېلو هېوادونو څخه هم ۱۵۰ تنه دیني عالمان په دې کنفرانس کې وګډون وکړي.
د یادونې ده چې یاد کانفرانس د اسلامي هېوادونو د همکارۍ او د دغو هېوادونو د بهرنیو چارو وزیرانو د سازمان د ناستې په ترڅ کې د شوي پرېکړهلیک په پایله کې برابر شوی دی.
په همدې حال کې د افغانستان د سولې عالي شورا وايي، په نږدې راتلونکي کې به افغانان د سولې او پخلاينې په برخه کې د يوى پرمختګ شاهدان وي او لوی زیری به واوري.
