د سرپل ولایت اوسېدونکي وايي، که افغان حکومت یې پر وسلو سمبال کړي، دوی به په خپله وسله وال طالبان له سیمو و شړي.
د دغه ولایت لسګونو ولسي خلکو نن (اکټوبر په ۱۳مه) په یوې غونډې کې راټول شوي وو او له حکومت څخه یې د طالبانو پر وړاندې د څرګند سیاست غوښتنه وکړله.
د سرپل ولایت قومي مشر عبدالحمید وايي، چې نور له دې اوږدې جګړې ستړي شوي دي.
نوموړي وویل، که افغان حکومت دغه ولایت ته پاملرنه ونه کړي د کندوز پېښه به تکرار شي.
همدا ډول د دغه ولایت دیني عالم شیخ عبدالله وویل، چې طالبان د بشر حقونو ماتونکي دي او په کوهستاناتو ولسوالۍ کې یې ولسي خلک ربړولي دي.
دغه دیني عالم زیاته کړه، سرپل ولایت ته د حکومت نه پاملرنې له کبله د دې وېره شته، چې د کندوز له برخلیک سره مخ شي.
د سرپل ولایت امنیې قومندان سرپرست محمد اصف جبارخېل سلام وطندار ته وویل، د کافي امنیتي ځواکونو او نظامي تجهیزاتو نشتوالي له امله ځېنې برخې د وسله والو طالبانو په ولکه کې دي.
جبارخېل وویل، ټاکل شوې ده، چې یاد ولایت ته نوي تازه دمي ځواکونه راورسېږي او د هغو سیمو نیولو له پاره عملیات پيل کړي، چې د طالبانو په ولکه کې دي.
د نوموړي په خبره، په دغو عملیاتو کې به ولسي پاڅون کوونکي هم ګډون ولري.
د راپورونو پر بنسټ د دغه ولایت کوهستاناتو ولسوالۍ اوسمهال د طالبانو په واک کې ده.
د امنیتي مسولینو پر وینا د کندوز سقوط طالبانو ته مرال ور کړ او له دې وروسته یې پر بغلان، بدخشان، سرپل او غزني ولایتونو باندې بریدونه زیات کړل.
