سرپل ولایتی خاتین قیزلر ادارهسی نینگ باشلیغی نسیمه آرزو نینگ سلام وطندارگه ایتیشیچه، طالبلر ایکی خاتیننی اویدن قاچگنلیک همده نا مشروع عملگه عیبلب بیرینچیدن دره اوریب سونگ اوققه توتیب هلاک قیلگنلر.
خانم آرزو، صیاد ولسوالیگی نینگ یشاووچیسی 24 یاشلی رخشانه اویدن قاچگن لیک همده نا مشروع عملگه عیب له نیب پولیس تامانیدن قولگه آلینیب، قماق مددتی نی توتگتدن کیین آزاد ایتیلگن لیگینی ایتگن. اونگه کوره، بو خانم آزاد ایتیلگن دن سونگ طالبلر تامانیدن قولگه آلینیب دُره اوریلگندن سونگ آتیب اولدیریلگن.
باشقه بیر حادثهده سرپل کوهستان ولسواللیگی نینگ یشاووچیسی 25 یاشلی خانم افروز هم نا مشروع عملگه عیب له نیب پولیس آرقهلی قولگه آلینگن. افروز عیبی نی تصدیق لاووچی حجت بولمه گنی سبب او آزاد لیککه چیقاریلهدی. افروز هم نیچه مددت دن کیین طالب لر تامانیدن تنیلیب قولگه آلینیشی بیلن یوز دُره اوریلیب سونگ اولدیریلهدی.
ولایت امنیه قوماندانی نور حبیب گلبهاری نینگ سوزلریگه کوره، حادثه ده قولی بولگنلرنی اوشلش اوچون پولیس تیرگاو باشلهگن.
قویاش جاری ییلده سرپل ولایتیده خاتین لرگه قرشی یوز بیرگن 17 مورد رویخطگه آلینگنی ایتیلهدی.
سونگی مورد ده اوتگن کون بدخشان ولایتی نینگ بهارک ولسواللیگیده گلالی ناملی 18 یاشر قیز اویدن قاچگنلیک عیبی بیلن قوراللی شخصلر آرقهلی عایلهسی نینگ حضوریده اولدیریلدی.
