سازمان شوي جرمونه، په ځانګړي ډول ترورونه، برمته کول او وسلهوالې غلاوې هغه ورانکاري فعالیتونه دي، چې د وخت په تېرېدو سره په هرات ولایت کې مخ پر زیاتېدو دي.
پهدې ولایت کې په وروستیو اوونيو کې وسلهوالو ترورونه زیات شوي، چې د امنیتي ارګانونو پر وینا، په تړاو یې نیول شوي مجرمان هغه کسان دي، چې لهدې مخکې هم په ورته جرمونو نیول شوي او زنداني شوي.
د هرات امنیه قوماندان محمدایوب انصاري وايي، پهدې مجرمانو کې داسې هغه هم شته، چې کال یا ۶ میاشتې په زندان کې له تېرولو وروسته خوشې شوي او بېرته یې په جرمونو شروع کړېده.
د هرات د سوداګرۍ خونې رییس سعد خطیبي بیا په ټینګار سره وايي، چې د ترورونو او وسلهوالو غلاوو سازمانول په هرات زندان کېږي او له هماغه ځایه رهبري اخلي.
خو پوښتنه دا ده، چې زندان د مجرمانو د اصلاح که د هغوی د روزلو او فعالیتونو د برجستهکېدا ځای دی؟
تحلیلګران پهدې باور دي، چې په زندانونو کې پر مجرمانو له حده زیات ترحم او د هغوی د بښې په تړاو د فرمانونو صادرېدل د دې لامل شوي، چې په مکرر ډول خپلو فعالیتونو ته زمینه برابره کړي.
په هرات کې د سیاسي چارو شنونکی عليکاوه وايي، چې په افغانستان کې د معیاري زندانونو او د مجرمانو د اصلاح او روزنې لهپاره د مناسبو پروګرامونو نهشتوالی د دې لامل شویدی، چې هغوی د اصلاح پر ځای نور هم زړهور شي او له زندانه له وتلو وروسته بېرته خپلو فعالیتونو ته ور وګرځي.
خو د هرات استېناف څارنوالۍ رییس عبدالحق احمدي د دې ولایت زندان په ټولو هېواد کې معیاري هغه ګڼي او وايي، چې پهدې زندان کې ۲۸۰۰ تنه زندانیان موجود دي، چې له ډلې یې ۲ زره تنه په کورسونو، سواد زدهکړو او حرفوي کارونو بوخت دي.
د ده پر وینا، محکمه پر زندانیانو مکرراً جزاوې سختوي.
په ورته وخت کې د هرات زندان مطبوعاتي مسوول کبیر سیار بیا دا ادعاوې ردوي، چې ګوندې د ترور او غلاوو سازمانول له هرات زندانه کېږی. دی زیاتوي، چې هېڅ زنداني حاضر نهدی، چې له زندانه له وتلو وروسته بیاځلي جرمونو ته مخه کړي.
لهدې هر څه سره ـ سره یو شمېر کارپوهان پهدې باور دي، چې د هېواد دوښمنان، لوی او واړه مجرمان په افغانستان کې له دننه زندانونو نه ترهګریز فعالیتونه او وسلهوالې غلاوې سازمانوي، چې د مخنیوي لهپاره یې لازم اقدامات پهکار دي.
