هالېنډ د ښځینه هاکي نړۍوال جام سیالیو ۱۴ پړاو کې چې د انګلستان په کوربتوب جوړې شوې وې، د نړۍوال جام اتلولۍ په ګټلو سره د ۸ م ځل لهپاره ریکارډ جوړ کړ.
د یادو سیالیو رسمي وېبپاڼې د معلوماتو له مخې، که څه هم د ایرلېنډ ښځینه هاکي لوبډلې تر فاینله بېکچې مینهوال خپل کړي وو، خو په پایلوبه کې یې د دفاعي اتلې هالینډۍ لوبډلې د بریدونو ځواب ورنهکړ.
د هالینډ ښځینه هاکي ملي لوبډلې د ایرلېنډ لوبډله یو ځل بیا د ۲۰۰۲ کال نړۍوال جام له سرنوشت سره مخ کړه او په یو اړخیز ډول يې ۶ پر صفر ګولونو سره ماتې ورکړه.
د ایرلېنډ ښځینه هاکي ملي لوبډله په خپل تاریخ کې د لومړي ځل لهپاره د هاکي نړۍوال جام سیالیو فاینل ته رسېدلې وه او تر ۲۰۰۲ کال نړۍوال جام سیالیو وروسته یې دا لومړی ځل و چې د هالېنډ ښځینه هاکي ملي لوبډلې سره مخامخ شوه. دې لوبډلې هاغه مهال هم د ۶ پر صفر ګولونو سره لوبه بایللې وه.
هالېنډ لوبډلې د سږکال په ښځینه هاکي نړۍوال جام سیالیو کې ۶ سیالۍ وکړې چې ۵ یې وګټلې، یوه یې مساوي کړه او په ۱۶ امتیازونو سره یې د لومړي مقام ګټلو ترڅنګ، د سرو زرو مډال هم واخیست.
ښځینه هاکي نړۍوال جام سیالۍ په هرو څلورو کلونو کې یو ځل په یوه غړي هېواد کې جوړېږي. چین په دې سیالیو کې د ۱۶ هېوادونو په ډله کې د یوې مساوي لوبې او ۲ ماتو سره وروستی مقام خپل کړ.
تر هالېنډ وروسته، د ایرلېنډ لوبډلې د سپینو زرو او د هسپانیې ښځینه هاکي ملي لوبډلې د برونزو مډالونه وګټل.
په دې سیالیو کې هالینډۍ لوبغاړې کيټي ون میل په ۸ ګولونو سره د مخکښې ګولوهونکې، ایرلېنډۍ لوبغاړې اییشه میکفیران د غوره ګولساتونکې او هالینډي لوبغاړي ویلټن بیا د ټورنمنټ غوره لوبغاړي جایزې واخیستې.
دغه راز ایرلېنډۍ ښځینه هاکي ملي لوبډله د لومړي ځل لهپاره په خپل تاریخ کې د ښځینه هاکي نړۍوالې درجه بندۍ کې د ۱۰ غوره لوبډلو په کتار کې راغله.
ټاکل شوې د ښځینه هاکي نړۍوال جام سیالۍ به ۴ کاله وروسته په ۲۰۲۲ کال کې وشي چې تراوسه یې د کوربه هېواد په اړه معلومات نهدي خپاره شوي.
