د روښنايۍ غورځنګ غړي وايي، چې د دهمزنګ پېښې په اړه د حکومت حقیقت پلټونکی ګومارل شوی کمېسیون مشروعیت نه لري.
د دې غورځنګ غړي وايي، که د کمېسیون نتیجه هر څه شي؛ سر له اوسه د شهیدانو د کورنیو له خوا مردود دی.
د روښنايۍ غورځنګ غړی داود ناجي نن (چهار شنبه) په کابل کې د خبري غونډې پر مهال حکومت تورن کړ او یې ویل، چې "د روښنایۍ غورځنګ له نظره حکومت او امنیتي ځواکونو په خپله د دهمزنګ په پېښه کې لاس لرلو، نو حکومتي کمېسیون مشروعیت نه لري او په ناپېيیلي ډول حقیقت موندنه نه شي کولی."
د ناجي په خبره، د حکومت مشران د دهمزنګ د پېښې مسوولین دي او امنیتي ځواکونو هم د پېښې په مخنیوي کې غفلت کړی دی.
داود ناجي ټینګار کولو، چې د زمري د دویمې ورځې پېښه دې د نړیوالو بنسټونو او متخصصو خلکو له لوري وڅېړل شي.
د دې غورځنګ بل غړی احمد بهزاد وايي، د دهمزنګ په پېښه کې د حکومت د لاس لرلو په اړه ډېرې داسې نښې شته او زیاته یې کړه، چې دوی به دغه اسناد په خپل وخت د خلکو او پلټونکي کمېسیون په واک کې ورکړي.
بهزاد وویل، چې که حکومت په سم ډول د دې پېښې پلټل غواړي، نو د روښنایۍ غورځنګ د وړاندیزونو ملاتړ دې وکړي او د دې پېښې د څېړلو له پاره دې یو نړیوال کمېسیون وټاکي، چې د نړیوالو بنسټونو تر څار لاندې وي.
احمد بهزاد وايي، حکومت د اسد دویمې په ورځ د دې پر ځای چې د خلکو امنیت ونیسي د خپل ځان امنیت یې نیولو.
د دهمزنګ په خونړۍ پېښه کې ۸۴ تنه ولسي خلک ووژل شول او ۲۳۱تنه په کې ټپیان شول.
وموغوښتل، چې په دې اړه د ولسمشرۍ ماڼۍ نظر هم واخلو، خو د پرلپسې تماسونو سره بیا هم اړیکه ځواب نه شوه.
