اجرایه ریاست وایي، په اوس وخت کې د لنډ مهاله حکومت د جوړولو بحث هیڅ امکان نه لري چې پرې خبرې وشي ځکه د ولسواکۍ نظام له یوه بنسټیز ځای نه پیل شوی او د احمد ضیا مسعود وروستي ګواښونه د افغانستان له ملي ګټو سره سمون نهخوري.
د ۵ شنبې په ورځ کابل کې د اجرایه ریاست ویاند مجیب رحیمي د خبري غونډې په ترڅ کې په ښې حکومتولۍ کې د ولسمشر د سلاکار احمد ضیا مسعود ګوښه کیدو ته په اشارې سره په دې اندیښنه وښوده، چې ولسمشرۍ ماڼۍ د مسعود په ګوښه کیدو کې له اجرایه ریاست سره مشوره نهده کړې.
رحیمي زیاتوي، هیڅ چاته به هم د دې اجازه ور نه کړي چې د لنډ مهاله حکومت د جوړولو هڅې وکړي.
هغه دا خبرې په داسې حال کې کوي، چې په ښې حکومتولۍ کې د ولسمشر سلاکار تېره شپه د ولسمشر د ځانګړي فرمان لهمخې لهدندې ګوښه شو.
نوموړي خبردار ورکړ، چې دی به ډیر ژر د لنډمهاله حکومت د جوړولو هڅې پیل کړي او د ده لرې کېدا به په افغانستان کې داخلي جنګونو ته لاره هواره کړي.
همدارنګه رحمیي زیاتوي، د ننګرهار په اچین کې د امریکا د ترټولو لوی بم کارول کیدای شي د سیمې هیوادونو په ځانګړې توګه پاکستان ته چې یو تروریست پاله هیواد دی یو لوی خبرداری و اوسي ترڅو د تروریستي ډلو له روزلو لاس واخلي.
امریکا تیره اوونۍ د ننګرهار په اچین ولسوالۍ کې د داعش ډلې د ځپلو په موخه هغه بم وکاروه چې د بمونو مور او له اټوم بم وروسته د نړۍ تر ټولو لوی بم ګڼل کیده.
د امریکا ولسمشر ډونالډ ټرامپ د دغه بم استعمال خورا بریالی بللی دی.
