د فاریاب ولایتي شورا رییس محمد طاهر رحماني ادعا کوي د دې ولایت زیاتره برخې د طالبانو په ولکه کې دي او فاریاب سقوط کوي.
دی وایي، موضوع یې د ولایت له مقام سره شریکه کړې، خو ځايي اداره یې خبرې ته پام نهکوي.
محمد طاهر رحماني زیاتوي، له هرې یوې ولسوالۍ یوازې ۲ الی ۳ کلي د دولت په ولکه کې دي او په نورو ټولو طالبان واکمن دي.
دی وایي، که مسوولان یې خبرداري ته پام ونهکړي د لاریونونو له لارې به د چارواکیو غوږنونو ته دا خبره ورسوي؛ ترڅو فاریاب د کندوز له برخلیک سره مخ نهشي.
د فاریاب والي ویاند جاوید بیدار د ولایتي شورا رییس څرګندونې ردوي او زیاتوي چې دغه ډول خبرې دوښمن ته زمینه برابرول دي.
د والي ویاند وايي، فاریاب سقوط نه کوي، ځکه ډېر ژربه نظامي عملیات پیل شي.
د امنیې قوماندانۍ ویاند کریم یورش هم د ولایتي شورا رییس خبرې ردوي او زیاتوي چې چاڼیز عملیات په جریان کې دي او ولایت سقوط نهکوي.
خو د فاریاب زیاتره استوګن په ډېرو سیمو د طالبانو له ولکې اندېښنه لري او وايي، د میمنې ښار په زندان بدل شوی؛ دا ځکه چې نظامیان او ملکي خلک له ښاره وتلی نهشي.
دغه څرګندونې داسې مهال کېږي چې د ۲۰۹ شاهین قول اردو قوماندان جنرال امانالله مبین تېره اوونۍ فاریاب ته تللی و خلکو ته یې ډاډ وکړی چې فاریاب به په یو امن ولایت بدل کړي. نوموړي ژمنه کړې وه ډېر ژر به پراخ چاڼیز عملیات پیل کړي.
