بدخشان ولایتینینگ راغستان تومنیدهگی طالبلر، کونده روینجآب آلتین کانیدن 100-150 مینگ افغانی درآمد کولگه کیریتهدی.عین حالده، جاری ییل اوشبو ولایت کانلرینینگ درآمدی افغانستان دولتینی خزانهسیگه صِفرگه ییتیشگن.
بدخشان ولایتینینگ کانلرینی وضعیتیدن پیک تدقیقاتی خبرچیلیک مرکزی تامانیدن قولگه کیریتیلگن معلوماتلر اساسیده، قویاش جاری ییلده محلی حکومت مذکور ولایت کانلرینینگ درآمدیدن نهفقط بیر افغانی دولت خزانهسیگه تشلمهگن، بلکیم کانلر ناقانونی قوراللی گروهلر و طالبلر تامانیدن ناقانونی شکلده قازیب چیقاریلیشیگه توسیق بوله آلمهگن.
بدخشان ولایتینینگ محلی مسؤوللری، 1392- ییلدن بویان دولتگه قرشی قوراللی عصیانچیلر (طالبلر) راغستان تومنیدهگی روینجآب آلتین کانینی نظارتگه آلگنی و شونینگدیک، کان ایشلاوچیلریدن باج آلیشینی قبول قیلهدی.
روینجآب آلتین کانی، بیش ییل ایلگریگچه محل اهالیسی تامانیدن قُم یوویش شکلده قازیب چیقاریلگن. حاضر محلی مسؤوللرگه کوره، طالبلر و مذکور تومن یشاوچیلریدن 1500 دن آرتیق کیشی عصری و تخنیکی اسکونهلر بیلن اوشبو کاندن ناقانونی شکلده آلتین قازیب چیقارهدیلر.
ناقانونی قازیب چیقاریش و ایرکین بازار
افغانستان شمالشرقیده جایلشگن بدخشان ولایتی، ییر بوتونلیگی طبیعی کانلر و یخشی طبیعتگه ایگه دیر. رسمی منبعلر تامانیدن بیریلگن رقملر اساسیده، اوشبو ولایتده آلتین، بیروج، لعل، یاقوت، ابرک تاشی و تاش کومیر بولگن 16 کته و کیچیک کان تثبیت ایتیلگن؛ بیراق باشقه بیرقطار کانلر هم حاضرگهقدر مذکور ولایتنینگ کانلر محلی ادارهسیده رویخطگه آلینمهگن.
بوندن آلدین، راغستان تومنیده اینگ کته بیکادور آلتین کانی طالبلر تامانیدن نظارتگه آلینیب و ناقانونی شکلده قازیب چیقاریلیشی توغریسیده گزارشلر نشر ایتیلگن ایدی؛ لیکن راغستان تومنیده روینجآب آلتین کانی، مذکور تومندهگی کانلردن باشقه بیری بولیب بدخشان محلی ادارهسیده رویخطگه آلینمهگن و بو گزارشده تانیشتیریلیب و تیکشیریلهدی. شونینگدیک، اوشبو کاندن چیققن آلتین ظرفیتی و میزانی قنچه بولگنی حاضرگچه معلوم بولمهگن؛ بیراق (1) رسمی منبع معلوماتی و رقمیگه کوره، آلتین کانی کوکچه دینگیزی و اورین باسرلریده کینگ بیر منطقهنی تشکیل بیرگن و هر بیر مکعبده آلتین حجمی اورته شکلده 394 ملی گرام تخمین ایتیلگن.
بونگه قوشیمچه، (2) محلی منبعدن قولگه کیریتیلگن حجت اساسیده، کرانو منجان تومنی لاجورد کانی، جرم تومنینینگ بیروج کانی، خاش تومنینینگ یاقوت کانی، شهربزرگ تومنینینگ آلتین کانی و یوقاری یفتل دوآبه آلتین کانی هم نیچه ییلدن بیری طالبلر و ناقانونی قوراللی کیشیلرنینگ نظارتیده بولگن و اوشبو کانلر ناقانونی شکلده قازیب چیقاریلیشی مذکور گروهلر تامانیدن حاضرگچه دوام ایتماقده.
پیک خبرچیسی بیلن صحبت اوتکزگن محل بویوکلریدن بیرقطارینینگ ایتیشیچه، روینجآب آلتین کانی محل اهالیسی تامانیدن قازیب چیقاریلهدی و قوراللی طالبلر کاندن قازیب چیقاریلگن هر بیش مثال آلتیندن بیر مثقال باج آلهدی؛ بیراق اوشبو کان آلتینینینگ بازار و قاچاقی دولت حاکمیتیده بولگن بازارلرده بولهدی.
راغستان تومنیده محل بویوکلریدن بیری حیاتالله پیماننینگ ایتیشیچه: "اوشبو کاندن کونده قازیب چیقاریلهدیگن آلتین دولت نظارتیده بولگن مذکور تومننینگ زیرکی و تمیلر بازارلریده، ایرکین شکلده ساتیلهدی."
عین حالده، راغستان تومنینینگ ولسوالی غلامالله سید، حاکمیتلریده بولگن بازارلرده ناقانونی قازیب چیقاریلگن آلتین ناقانونی شکلده ساتیلیشی، قاچاق بولیشی و شو ییردن کابلگه انتقال بیریلیشینی قبول قیلهدی.
جناب پیمانگه کوره، روینجآب کانینینگ هر بیر مثقال آلتینی اوشبو تومن بازارلریده 11-12 مینگ افغانی ساتیلهدی.
مذکور محل بویوکینینگ کوپهیتیریشیچه، اوچ ییل ایلگریچه، محل اهالیسی کونده اوشبو کاندن 500 دن 600 مثقال آلتین قولگه کیریتهدی ایکن؛ بیراق بو کان طالبلر تامانیدن بوتونلهی نظارتگه آلینگنی و باج آلیشی اوچون حاضر ایسلنگن مقدار کوپهیگنی و کمهیگنیدن خبر یوق دیر.
اونگه کوره، طالبان گروهی آلتین کانیدن فایدهلنگنی و اهالیدن باج آلیشی باعث، مذکور تومننینگ ایریم منطقهلریده کینگ شکلده فعالیت و حاکمیت قیلهدی. اونینگ کوپهیتیریشیچه،: "بیر-ایکی ییل ایلگریگچه اوشبو تومنده قوراللی طالبلر رقمی 100 دن آرتیق ایمس ایکن، لیکن کان ساحهسیده حاضر 500-600 قوراللی طالب حاکم شکلده فعالیت قیلهدی و اوشبو کاننینگ درآمدی دن اونلرچه آغیر و یینگیل حربی جهاز ساتیب آلگن."
شونینگدیک، بدخشان حاکمی اورین باسری گلمحمد بیدار، راغستان تومنیده آزمه-کوپ 600 ایچکی و تشقی جنگری طالب موجودلیگینی تصدیقلیدی. اونینگ کوپهیتیریشیچه، اوتگن ییل اوشبو ولایت پولیسی روینجآب کانینی بیر آی نظارتگه آلگن، لیکن اونی سقله آلمهگنی اوچون، قیتهدن طالبلرنینگ نظارتیگه اوتگن.
اونگه کوره، کانده ایشلهیدیگن محل یشاوچیلریدن طالبلر 5 دن بیر حق آلهدی و یالغیز روینجآب آلتین کانیدن کونده 100-150 مینگ افغانی قولگه کیریتهدی. بیراق، اوشبو ولایتده طالبلرنینگ نظارتیده بولگن بیکادور آلتین کانی، کرانومنجان لاجوردی و باشقه کانلردن قولگه کیریتیلهدیگن درآمد میزانیدن دقیق رقم قولده ایمس دیر. بوندن آلدین، میلادی 2014- ییلده بدخشان ولایتینینگ کانلریدن طالبلر و محلی زورهوانلر 1 دن 20 میلیون دالر دآرمد قولگه کیلیشی توغریسیده (global witness) ناملی خلق ارا تدقیقات ادارهسی تامانیدن گزارش ترقهتیلگن ایدی.
شوندهی بیرحالده، راغستان تومنیده طالبان گروهی فعالیتی، تشکیلاتی و کان درآمدیدن بیریلگن رقم قنچهلیک توغری بولگنی خصوصیده، پیک خبرچیسینینگ سعی و حرکتلری احتمالی امنیتی تهدیدلر باعث، نتیجهسیز قالگن؛ بیراق، کانده ایشلهیدیگن محل یشاوچیلریدن (مستعار) حبیبنینگ پیک خبرچیسیگه ایتیشیچه: "کان یقینیدهگی قیشلاقلرده طالبلر زوردن اهالینی ایشلَتهدی."
حاکمیتسیزلیک درامد کمهییشیگه سبب بولهدی
(3) رسمی منبع تامانیدن بیریلگن معلومات و حجتلرنی کورسهتیشیچه، 3 ییل ایلگریگچه افغانستان دولتینینگ خزانهسیگه بدخشان ولایتینینگ کانلریدن توکیلهدیگن درآمد میزانی کوپیماقده ایکن؛ بیراق 3 ییلدن بویان درآمد میزانی صفرگه ییتیشگن.
بدخشان ولایتینینگ محلی مسؤوللری، اوشبو ولایتده ناتینچلیکلر شدتلنگنی و دولتگه قرشی قوراللی عصیانچیلرنینگ حرکتلری کوپهیگنی و شونینگدیک، اوشبو ولایت کانلریدهگی ایش مرکزی حکومت تامانیدن توختهتیلگنی سبب، درآمد میزانی صفرگه ییتیشگن دییدی. بیراق، راغستان تومنی محلی بویوکلریدن بیری جناب پیماننینگ ایشانچیگه کوره، حکومتدن فرمانسیزلیک و ناقانونی درآمدلر، آلتین قازیب چیقاریش اوچون طالبلر بیلن محل اهالیسینینگ همکارلیگی باعث، اوشبو ولایت کانلریگه محلی حکومت حاکم بوله آلمهیدی.
عین حالده، بدخشان پولیس قومندانی عبدالخالق آقساینینگ ایتیشیچه، انشاعات و ییترلیچه پرسونل یوقلیگی باعث، محلی حکومت کانلر ناقانونی قازیب چیقاریلیشیگه توسیق بوله آلمهیدی و جناب آقسای، مرکزی حکومتدن اوشبو ولایتده کانلرنی قوریش اوچون خاص بیر حربی قطعه ایجاد ایتیلیشینی طلب قیلگن.
بیراق، ایچکی ایشلر وزیرلیگی سوزلاوچیسی اورین باسری نصرت رحیمینینگ ایتیشیچه، اوشبو وزیرلیک راغستان تومنینینگ روینجآب آلتین کانی قیتهدن نظارتگه آلینیشی اوچون حربی عملیات یولگه قوییلیشیگه بدخشان پولیس قومندانلیگیگه بویروغ بیرگن.
خاص قطعه ایجاد ایتیلیش طلبی توغریسیده جناب رحیمینینگ کوپهیتیریشیچه، اونی بدلیگه مذکور ولایتده پولیس رقمی کوپهیتیریلهدی.
باشقه تاماندن، بدخشان کانلرینی ایشی توختهتیلگنی و اوشبو ولایت کانلرینینگ درآمدی صفر بولگنی توغریسیده، بدخشان ولایتینینگ کانلر محلی مسؤوللریدن هیچ بیری، کانلر و پترولیم وزیرلیگی تامانیدن مصاحبهگه رخصت بیریلمهگنی سبب، صحبت بیریشگه حاضر بولمهدی. بیراق، کانلر و پترولیم وزیرلیگینینگ اورغولشیچه، کانلرنی قازیب چیقاریش شرطنامهلریدن بیرقطاریده حقوقی و تخنیکی قیینچیلیکلر بولگنی باعث، مملکت بوییچه کوپینچه کانلرنی ایشی توختهتیلگن و اقتصادی عالی کینگش قراریدن سونگ، حقلی و کوچلی شرکتلرگه تاپشیریلهدی.
شونینگدیک، پیک خبرچیسیگه صحبت بیرگن کانلر و پترولیم وزیرلیگی سوزلاوچیسی عبدالقدیر مطفی، قراردادلر توختهتیلگنی و بدخشان شامل ایریم ولایتلرنینگ درآمدی صفر بولگنی؛ مملکتنینگ ایریم منطقهلریده محل اهالیسی، زورهوانلر و طالبلر آرقهلی کانلر ناقانونی شکلده قازیب چیقاریلیشی کوپهیگنینی تَن آلهدی؛ بیراق کانلرنی ناقانونی قازیب چیقاریش آلدی آلینیشی توغریسیده ایتیشیچه: "مملکت کانلری ناقانونی قازیب چیقاریلیش آلدی آلینیشی اوچون ینگی ریجه اوستیگه حاضرگچه ایش قیلینماقده و کانلرنی ینگی قراردادلریدن بیرقطاری نهایی بولگن و باشقه بیرقطاری تیکشیریلماقده دیر."
عین حالده، افغانستان شفافیت ادارهسی، مملکتده کانلر ناقانونی و دواملی شکلده قازیب چیقاریلیشیدن خواطر بیلدیریب اورغولشیچه، حکومت مملکتده طبیعی منبعلرنی دقیق و یخشی بیر شکلده نظارت قیله آلمهیدی و برچه نرسهدن اونملی دولت تشکیلاتیده فساد کینگهیگنی سبب، مملکت کانلری اوستیگه دولتگه قرشی قوراللی گروهلر، محلی زورهوانلر و تینچ اهالی حاکم بولگن.
مذکور ادارهنینگ علاقهوی و دادخواهلیک مسؤولی ناصر تیمورینینگ ایتیشیچه:
"مملکت بوییچه 1500 دن آرتیق کان آرهسیدن، یالغیز چمهسی 50 کان دولت حاکمیتیده بولگن و قالگنی طالبلرنینگ حاکمیتیده بولیب ناقانونی قوراللیلر و محلی زورهوانلر تامانیدن ناقانونی شکلده قازیب چیقاریلهدی."
اوشبو اداره حکومتدن مملکتنینگ ملی سرمایهسی تالان بولیشی آلدی آلینیشی اوچون کانلرنی قوریب و یخشی بیر شکلده نظارت بولیشینی کوچلنتیریب و کانلردن قولگه کیریتیلگن درآمدنی ییغیش اوچون خاص بیر بانکی حساب ایجاد ایتیلیشی و کانلر قانونیگه قیته تیکلنیشی خصوصیده، سعی و حرکت قیلیشینی سورهگن.
نوت:
- رسمی منبع/ پژواک خبری آژانسی-بدخشان کانلری
- قولگه کیریتیلگن حجت/ بدخشان کانلر ریاستینینگ مُهر و امضاءسی بیلن طالبلرنینگ حاکمیتیده بولگن کانلرنینگ قلمی رویخطی
- رسمی منبعلردن آلینگن معلوماتلر/ بدخشان کانلر ریاستینینگ مُهر و امضاءسی بیلن کتبی معلومات
