نن په کابل کې د دې ۲۶ پراختیايي پروژو هوکړه لیک په افغانستان کې د هند سفیر او د اقتصاد، کار او ټولنیزو چارو، لوړو زدهکړو، پوهنې، کلیو پراختیا، عامې روغتیا، عدليې او ښار جوړونې وزارتونو او ځېنو اړوندو بنسټونو ترمنځ د اجرایوي رییس ډاکټر عبدالله او د ولسي جرګې د ځېنو غړیو په حضور کې لاسلیک شو.
د ښاغلي مستور په وینا، دا ۲۶ پروژې ۹.۵ میلیونه ډالره ارزښت لري چې «د ټولنیزو لوړو اغېزو سره» د هند د پراختیايي پروژو د ۱۲۰ میلیون ډالري مرستې څخه تمویلېږي.
د اقتصاد وزیر مصطفی مستور وايي چې دغه پروژې به د کابل، بامیان، دایکندي، بادغیس، کاپیسا، لوګر، بدخشان، هلمند، غور، ننګرهار، خوست، بلخ، سرپُل او هرات ولایتونو کې پلې شي.
د ده په وینا، دا پروژې به د امنیت په ښه کولو، کاري موکو په پیداکولو، د اقتصادي کډوالۍ په کمولو، له حکومته د ملاتړیو په پيدا کولو، ټولنیزو او اقتصادي بدلونونو کې مثبت رول ولوبوي.
د اقتصاد وزارت چارواکي وايي چې دغه پروژې د اقتصاد وزارت سره په همغږۍ د تلپاتې پراختیا د موخو او د افغانستان د سولې او پراختیا لهپاره د ملي چوکاټ په اساس پلې کېږي.
هند له ۲۰۰۵ کال څخه تر ۲۰۲۱ کال پورې له ټولنیزو لوړو اغیزو سره ۵۷۷ پراختیايي پروژو د پلي کولو ژمنه کړې چې په درېیوو پړاوونو کې د ۱۲۰ میلیونو ډالرو په ارزښت پلې کېږي. لهدې ډلې تر اوسه د ۶۵ میلیونو ډالرو په ارزښت ۳۲۷ پروژې بشپړې شوېدي او پاتې یې تر کار او یا هم تر تدارکاتي پروسې لاندې دي.
د هند له لوري دغه ژمنه شوې پروژې تر ډېره په سرحدي ولسواليو کې پلې کېږي.
