د غزني ولایتي شورا رییس خالقداد اکبري وايي، چې په زابل ولایت کې ۱۹ تنه برمته شوي مسافر څو ساعته مخکې د جاغوري ولسوالۍ په سیمه تبادله شول.
اکبري وايي چې پاتې برمته شویو مسافر به په دویم پړاو کې تبادله شي.
د شورا رییس وایي، چې دغه برمته شوي کسان په داسې سیمې کې دي چې هلته ټیلیفوني شبکې کار نه کوي.
سرچینه وايي، چې د جاغوري ولسوالۍ چارواکو د یادو کسانو د انتقال له پاره چمتوالی نیولی دی.
دغه کسان د تېر کال د کب په ۴مه له کندهار نه کابل ته په لاره وو، چې د زابل ولایت د شاه جوی ولسوالۍ په سیمه کې د مخ پټو وسله والو له خوا برمته شول.
د برمته شویو کورنۍ او یو شمېر مدني فعالانو حکومت د برمته شویو مسافرو په تړا څو ځلي په بې پروايۍ تورن کړی و او زرنګار پارک کې د تحصن خیمې درولې وې.
